इमेज बचत संकटमा परेसँगै अन्य ६ सहकारीको रकम जोखिममा

काठमाडौं : बागलुङको इमेज बचत तथा ऋण सहकारी संस्थामा समान प्रकृतिका अन्य सहकारीको पनि कारोबार रहेको खुलेको छ । उक्त संस्था संकटमा परेसँगै ६ वटा सहकारी संस्थाको रकम पनि जोखिममा परेको छ । यतिबेला संस्थाका अध्यक्षसहित ७ जना फरार छन् । एक सञ्चालक र २ जना कर्मचारीलाई थुनामा राख्न जिल्ला अदालत बागलुङले आदेश दिएको छ ।

इमेज सहकारीमा कालिका बहुउद्देश्यीय सहकारी संस्थाको ३९ लाख ८७ हजार ७ सय ९९ रुपैयाँ र पालुवा व्यवसायिक कृषि सहकारी संस्थाको २७ लाख ३७ हजार १ सय ५९ रुपैयाँ रहेको पाइएको छ । त्यस्तै बागलुङको भूपु शैनिक साकोसको ८३ लाख ७७ हजार १ सय २६ रुपैयाँ, गलकोट बहुउद्देश्यीय सहकारी संस्थाको ३ लाख ६ हजार ७ सय २३ रुपैयाँ र जीवन सागर महिला सहकारी संस्थाको ४५ हजार ५ सय रुपैयाँ रहेको पाइएको छ । त्यसैगरी म्याग्दीको रत्न बहुउद्देश्यीय सहकारी संस्थाको २५ हजार ८ सय ७७ रुपैयाँ पनि जोखिममा परेको छ । एउटा प्रारम्भिक सहकारीले अर्को प्रारम्भिक सहकारी संस्थासँग कारोबार गर्नु गैर कानुनी हो ।

इमेज सहकारीले एक अर्ब ५१ करोड हिनामिना गरेको भन्दै एक हजार चार सय ८१ जना बचतकर्ताले एक अर्ब ३० करोड बिगो दाबी गरेर सहकारीका कर्मचारी र सञ्चालक गरी ११ जनाविरुद्ध अदालतमा ठगीको मुद्दा दर्ता गरेका थिए ।