कानुन सुधार गरेर सहकारीको समस्या समाधान गरिने, कार्यदल गठन गर्ने सरकारको निर्णय

काठमाडौं : मंगलबार बसेको मन्त्रिपरिषद् बैंठकले सहकारी सम्बद्ध कानुन सुधार गर्नका लागि कार्यदल गठन गर्ने निर्णय गरेको छ।

सहकारी क्षेत्रका समस्या पहिचान गरी त्यसको समाधान गर्न नीतिगत र कानुनी सुधारका लागि कार्यदल गठन गर्ने निर्णय सरकारले गरेको हो । सहकारीमा देखिएको वर्तमान समस्या पहिचान गर्ने र समस्या समाधानका लागि नीतिगत तथा कार्यान्वयन तहमा सुधार गर्न सक्ने कार्ययोजना सहितको सुझाव पेश गर्नेगरी कार्यदल बनाउने निर्णय भएको सञ्चारमन्त्री रेखा शर्माले जानकारी दिइन् ।

राष्ट्रिय योजना आयोगको भूमि व्यवस्था, सहकारी तथा गरिबी निवारण मन्त्रालयल हेर्ने सदस्यको संयोजकत्वमा कार्यदल गठन हुनेछ । उक्त कार्यदलमा भूमि व्यवस्था, सहकारी तथा गरिबी निवारण मन्त्रालयका सचिव सदस्य रहनेछन् । त्यस्तै कार्यदलमा अर्थ मन्त्रालयका सहसचिव, सहकारी विज्ञ पनि सदस्य रहनेछन् ।

सहकारी विभागले केही समय अघि कार्यदल गठन गर्न सक्ने कार्यविधिको मस्यौदा मन्त्रालयमा पेश गरेको थियो ।