अन्तर्राष्ट्रिय सहकारी दिवसको नारा तय

काठमाडौं : अन्तर्राष्ट्रिय सहकारी महासंघ (आईसीए) ले १०१ औं अन्तर्राष्ट्रिय सहकारी दिवस–२०२३ का लागि थिम (नारा) तय गरेको छ । आईसीएले यस वर्षको लागि ‘दिगो विकासका लागि सहकारी’ नारा तय गरेको हो । हरेक वर्षको जुलाई पहिलो शनिबार अन्तर्राष्ट्रिय सहकारी दिवस विश्वभर मनाउँदै आएको छ । यस वर्ष जुलाई १ तारिख अर्थात असार १६ गते अन्तर्राष्ट्रिय सहकारी दिवस परेको छ ।

यो १०१ औं अन्तर्राष्ट्रिय सहकारी दिवस र संयुक्त राष्ट्र संघबाट मान्यताप्राप्त २९ औं दिवस रहेको आइसीएले जनाएको छ । सन् २०२२ मा ‘सहकारीले राम्रो विश्व निर्माण गर्दछ’ नारा तय गरेको थियो ।

अन्तर्राष्ट्रिय सहकारी दिवस नेपालमा पनि हरेक वर्ष मनाउँदै आएको छ । राष्ट्रिय सहकारी महासंघको नेतृत्वमा नेपालमा सहकारी दिवस मनाउँदै आएको छ । महासंघले यस दिन विभिन्न सहकारी, व्यक्तीलाई सम्मान गरी दिवस मनाउँदै आएको छ।

सहकारी दिवसको नाराले सहकारी मूल्य र सिद्धान्तहरुबाट प्रेरित हुँदै सहकारीहरुले दिगो विकास लक्ष्य हासिल गर्नका लागि काम गर्नेछन् भन्ने कुरालाई अझ पुष्टि गर्ने महासंघले जनाएको छ । दिगो विकास लक्ष्यको उपलब्धी र यसमा सहकारीहरुको योगदानलाई देखाउने अवसर भएको पनि आईसीएले जनाएको छ ।

विश्वभरका सहकारीहरुलाई अन्तर्राष्ट्रिय सहकारी दिवस मनाउन र सहकार्यको संस्कृतीको शक्ति देखाउन आईसीएका अध्यक्ष एरियल ग्वार्कोले आग्रह गरेका छन्।