किसान सहकारीको ४१ वटा सेवा केन्द्रमा सदस्य गोष्ठी सम्पन्न, विभिन्न विधामा सम्मान

कैलाली : किसान बहुउद्देश्यीय सहकारी संस्थाले ४१ वटा सेवा केन्द्रमा सेयर सदस्य प्रतिनिधि गोष्ठी (केन्द्र प्रमुख गोष्ठी २०७९) सम्पन्न गरेको छ ।

संस्थाले आगामी आर्थिक वर्षको नीति तथा कार्यक्रम तयार पर्नका लागि सेयर सदस्यहरुबाट राय, सुझाव सल्लाह संकलन गर्ने उद्देश्यका साथ गोष्ठीको आयोजना गरेको थियो । संस्थाले हरेक वर्ष गोष्ठी कार्यक्रम गर्दै आईरहको छ । साथै सदस्यसँग अन्तरक्रिया गरी संस्थाको गतिविधि बारे पनि गोष्ठीमार्फत जानकारी गराउने गरेको छ ।

चैत्र १ गतेबाट चैत्र १८ गतेसम्म ४१ वटा सेवा केन्द्रहरुमा गोष्ठी भएको थियो । गोष्ठीमा ७८ हजार सदस्यको प्रतिनिधीत्व गर्दै ५ हजार २ सय ५० जना सदस्यहरुको सहभागिता रहेको थियो । केन्द्र प्रमुख गोष्ठीमा जन्मदेखि मरणोपरान्तसम्म किसान-कोप योजना अन्तर्गत विभिन्न सुविधाहरु पनि वितरण गरियो ।

संस्थाले ८२ जनालाई रु पाँच हजारका दरले छात्रवृत्ती र एमबिबिएस अध्ययनरत सदस्यका ५ जना छोरोछोरीलाई रु १० हजारको दरले प्रोत्साहन स्वरुप प्रदान गरिएको थियो । त्यस्तै उपचार खर्च अन्र्तगत जटिल शल्यक्रिया तथा घातक रोग लागेरका २३ जना सदस्यलाई रु १५ हजारका दरले प्रदान गरिएको थियो ।

त्यस्तै गोष्ठीमा कर्जा लिई उत्कृष्ट उद्यम गरेका प्रत्येक सेवा केन्द्रका ५ जनाका दरले १ सय ७५ जना उद्यमी सदस्यलाई सम्मान गरिएको थियो । साथै १०५ जना उत्कृष्ट केन्द्र प्रमुखलाई समेत गोष्ठीको अवसरमा सम्मान गरिएको थियो ।

त्यसैगरी स्थानिय तह निर्वाचन २०७९ बाट निर्वाचित करिव १ सय ४० जना सदस्यलाई सम्मान समेत गरिएको थियो ।

किसान सहकारी संस्थाको २०७९ फाल्गुन मसान्त सम्मको वित्तीय विवरण अनुसार सेयर पुँजी करिब ३८ करोड, कुल बचत ३ अर्ब ४ करोड, कुल सम्पत्ति ५ अर्ब ३० करोड, लगानीमा रहेको कर्जा ४ अर्ब २७ करोड रहेको छ । त्यस्तै सेयर सदस्य संख्या ७८ हजार ४ सय ७० रहेको संस्थाले जनाएको छ ।

संस्थासँग लगानी योग्य रकम (तरता) २३.७ प्रतिशत रहेको संस्थाले जनाएको छ।