रामपुर साकोसद्वारा सदस्य सक्षमता विकास तालिम

पोखरा : रामपुर बचत तथा ऋण सहकारी संस्था, पाल्पाको आयोजनामा सदस्य सक्षमता विकास सम्बन्धि दुई दिने तालिम पोखरामा सुरु भएको छ ।

संस्थाका संचालक समिति, उपसमिति र सल्लाहकारका लागि नेपाल बचत तथा ऋण केन्द्रिय सहकारी संघ (नेफ्स्कुन) को प्राविधिक सहयोगमा तालिम आयोजना गरिएको हो । पोखरा लेकसाईडमा होटल लेकप्यालेसमा सहकारीका अध्यक्ष गुरुप्रसाद रेग्मीको अध्यक्षतामा तालिम शुभारम्भ गरिएको छ । अध्यक्ष रेग्मीले सहकारीको स्थापनादेखि हालसम्मका अवस्था जानकारी गराउँदै कार्यक्रमको उद्देश्य बारेमा जानकारी गराएका थिए ।

तालिमको उद्घाटन लुम्बिनी प्रदेश सभा सदस्य तथा सहकारीका निवर्तमान संचालक समिति अध्यक्ष राजुप्रसाद श्रेष्ठले गरेका थिए। श्रेष्ठले केही सहकारीले नीति नियम र कानुन अनुसार संचालन नहुँदा अहिले विकृति आएको बताउँदै सहकारीले सदस्य सेवालाई पहिलो प्राथमिकता दिएर काम गरेमा सबैको हित हुने बताए ।

प्रदेश सभा सदस्य श्रेष्ठले केही नियम विपरित चलेका सहकारीले गर्दा नियम संगत चलेका सहकारीलाई समेत अप्ठ्यारो पार्ने गरेको बताउउँदै सदस्य सबै मिलेर एकताबद्ध रूपमा अगाडि बढाउनुपर्ने बताए । समितिका उपाध्यक्ष बाबुराम श्रेष्ठको स्वागतबाट सुरु भएको तालिम उद्घाटन सत्रको संचालन संस्थाका सचिव कृतिनाथ श्रेष्ठले गरेका थिए ।

तालिममा सहकारी दर्ता, वातावरण, सहकारीको अवधारणा र विकासक्रम, बचत तथा ऋण सहकारीका अन्तर्राष्ट्रिय सिद्धान्त, व्यावहारिक प्रयोग, सहकारीको संस्थागत संरचना परिचय र समिति, उपसमितिको काम कर्तव्य र अधिकार लगायतका विषयमा सहभागीलाई प्रशिक्षण दिइएको छ । तालिमको सहजिकरण नेपाल बचत तथा ऋण सहकारी संघका सुर्यप्रसाद तिमिल्सिनाले गरेका छन्।