कोपोमिसमा आवद्ध हुने सहकारीको संख्या ४ गुणाले बढ्यो, १३१५६ ले भरे समष्टिगत विवरण

काठमाडौं : सहकारी विभागले अनिवार्य गरेको सहकारी तथा गरिवी सम्बन्धी व्यवस्थापन सूचना प्रणाली (कोपोमिस) मा समष्टिगत विवरण भर्ने सहकारीको संख्या १३ हजार १ सय ५६ पुगेको छ ।

पुष १७ गतेसम्मको तथ्यांक अनुसार कोपोमिसमा आवद्ध २८ हजार ७ सय ४२ सहकारी संघ/संस्था (पासवर्ड लिने) मध्ये १३ हजार १ सय ५६ ले मात्रै समष्टिगत विवरण भरेका छन् । त्यस्तै कम्तीमा एक पटक कोपोमिस लगइन गर्ने सहकारी संघ संस्थाले मात्रै १७ हजार २ सय ३६ मात्रै रहेका छन् । यसरी हेर्दा कोपोमिसमा समष्टिगत विवरण भर्ने सहकारी संख्यामा व्यापक सुधार आएको छ ।

तत्कालिन सहकारी विभागका रजिष्ट्रारले कोपोमिस कार्यान्वयनमा कडाई गरेको थियो । रजिष्ट्रार पण्डितले सहकारी संघ/संख्याको तथ्यांक संकलनको लागि समष्टिगत विवरण अनिवार्य भर्नुपर्ने प्रावधान ल्याएका थिए । रजिष्ट्रार पण्डित कै सिफारिसमा समष्टिगत विवरण नभर्ने सहकारी संघ/संस्थाले कर चुक्ताको प्रमाणपत्र नपाउने र धितो रोक्का लागि समेत कोपोमिसमा आवद्धता हुनुपर्ने व्यवस्था सरकारले गरेको थियो ।

त्यसपछि सहकारीहरु कोपोमिसमा आवद्ध हुन बाध्य भएको हो । अघिल्लो आर्थिक वर्षको अन्त्यमा ६ हजार ६ सय ७८ सहकारी मात्र कोपोमिसमा आवद्ध भएका थिए । चालु आर्थिक वर्षको पुष १७ गतेसम्म कोपोमिसमा आवद्ध हुने सहकारीको संख्या ४ गुणाले बढेर २८ हजार ७ सय ४२ पुगेको हो ।

हाल सहकारी विभागबाट सेवा लिनका लागि समेत कोपोमिस अनिवार्य गरिएको छ ।