किसान र विजयश्री गाभियो, विकू र किसान साकोस बीच पनि एकीकरणको चर्चा

गैँडाकोट : किसान उपभोक्ता सहकारी संस्था लिमिटेड र विजयश्री उपभोक्ता सहकारी संस्था लिमिटेड एकीकरण (मर्ज) भएका छन् । शनिबार गैंडाकोटमा एकीकरण सभा समेत सम्पन्न गरेको छ ।

एकीकरणपछि संस्थाको नाम विजयश्री उपभोक्ता सहकारी संस्था लिमिटेड र संस्थाद्वारा सञ्चालित मार्टहरुको नाम किसान मार्ट रहने सहमती भएको छ । किसान उपभोक्तालाई किसान बचत तथा ऋण सहकारी संस्था र विजयश्री उपभोक्तालाई विकू बचत तथा ऋण सहकारी संस्थाले प्रर्वद्धन गरेको थियो ।

सञ्चालक समितिमा अध्यक्ष र सचिवसहित ६ जना विजयश्रीबाट एवं उपाध्यक्ष र कोषाध्यक्ष सहित ७ जना किसानबाट रहने गरी सहमती भएको छ । एकीकरणपछि समितिको अध्यक्षमा केशवप्रसाद सापकोटा, उपाध्यक्षमा श्रीराम सुवेदी, सचिवमा गोविन्द रिमाल, कोषाध्यक्षमा डिलाराम सापकोटा चयन भएका छन् । त्यस्तै सदस्यहरुमा तिलकप्रसाद पराजुली, श्रीहरी चालिसे, गोपालप्रसाद गौतम, भानुभक्त लामिछाने, कृष्ण पाण्डे, सरस्वती सुवेदी सापकोटा, तारा शर्मा, उषा ज्ञवाली र सुधा ज्ञवाली रहेका छन् । त्यस्तै लेखा सदस्य संयोजकमा विष्णुप्रसाद सापकोटा, सदस्यहरुमा माधव वन र सीता रिजाल गौतम रहेका छन् ।

दुई संस्था एकीकरण भएसँगै विकू र किसान साकोस बीच एकीकरणको चर्चा सुरु भएको छ । विकू साकोसका पूर्व अध्यक्ष ईन्द्रराज ज्योती पौडेलले दुबै संस्थाका प्रवद्र्धकीय संस्थाहरु किसान र विकू एकीकरण हुन सकोस् शुभकामना व्यक्त गरेका थिए ।

किसान साकोसका अध्यक्ष श्रीहरी चालिसेले संस्था एकीकरण भएसँगै देशकै उत्कृष्ट सहकारीको रुपमा स्थापित हुन सकोस् भनि शुभकामना व्यक्त गरेका थिए । उपभोक्ता सहकारी एकीकरण भएसँगै किसान र विकू बीच पनि एकीकरण चर्चा सुरु भएको चालिसेले जानकारी दिए ।

हाल विजयश्रीले ३ वटा मार्ट र किसान उपभोक्ताले ३ वटा मार्ट सञ्चालन गर्दै आएका छन् । दुई संस्था एकीकरण भएपछि कुल मार्टको संख्या ६ पुगेको छ । त्यस्तै कावासोती र देवचुली नगरपालिकामा पनि मार्ट खोल्ने तयारी भएको छ ।