पुर्वाञ्चल सहकारीको २५औं साधारण सभा सम्पन्न, ५६ करोडको कारोबारबाट आठ करोड आम्दानी

प्रकाश बन्जारा 

सुनसरी : इटहरीमा रहेको पुर्वाञ्चल बचत तथा ऋण सहकारी संस्था लिमिटेडले एक वर्षमा ५६ करोड रुपैयाँ भन्दा बढीको कारोबार गरेको छ । संस्थाको २५ औँ वार्षिक साधारण सभामा शनिवार नाफा नोक्सान हिसाव प्रस्तुत गर्दै सम्पन्न भएको छ ।

संचालक समितिका अध्यक्ष दिनेश कुमार भट्टराईले संस्थाले आर्थिक वर्ष २०७८/०७९ मा ५६ करोड १४ लाख ८३ हजार १ सय ६७ रुपैयाँको कारोबार गरेको जानकारी दिए । अघिल्लो आर्थिक वर्षमा भन्दा सो आर्थिक वर्षमा संस्थाको कुल कारोबारमा ०.७६ प्रतिशतले कमी आएको बताउँदै संचालक भट्टराईले एक वर्षमा पुर्वाञ्चल बचत तथा ऋण सहकारी संस्थाले १ करोड ३४ लाख ८७ हजार ९८९ रुपैयाँ नाफा कमाएको बताए । अघिल्लो आर्थिक वर्षमा १ करोड २३ लाख रुपैयाँ नाफा कमाएको सहकारीले आर्थिक वर्ष २०७८/०७९ मा ९.२ प्रतिशतले नाफामा वृद्धि भएको बताइएको छ ।

चालु आर्थिक वर्षको असोज ६ गतेसम्ममा १ हजार ६ सय ६० जना सदस्य रहेको सहकारीको पुँजी १० करोड ५८ लाख ६८ हजार ८ सय रुपैँया रहेको र गत आर्थिक वर्षमा मात्रै ३९ करोड ६२ लाख ५९ हजार ४१३ रुपैँया निक्षेप संकलन गरी ५० करोड ८५ लाख ८२ हजार ९७१ रुपैँया ऋण लगानी गरेको साधारण सभामा सदस्यहरुलाई जानकारी गराइएको छ ।

साकोसले ८ करोड २७ लाख २ हजार २ सय २१ रुपैयाँ कुल आम्दानी गरेको छ । अघिल्लो आर्थिक वर्षमा ७ करोड २९ लाख नाफा कमाएको सहकारीले यसपटक १३.३० प्रतिशत नाफामा वृद्धि भएको जनाएको छ ।

संस्थाले ५ करोड ७३ लाख ५ सय ५१ रुपैयाँ रकम सदस्यहरुलाई व्याज भुक्तानी गरेको छ भने ४७ लाख ५४ हजार ७ सय ७२ रुपैयाँ राजश्व तिरेको छ ।

२०५३ सालमा स्थापना भएको पुर्वाञ्चल बचत तथा ऋण सहकारी हाल आफ्नै भवनमा रही वित्तीय र सहकारीका सदस्यको जिवन स्तर वृद्धिको काम गरीरहेको र भोलीका दिनमा अझ परिस्कृत हुँदै जाने अध्यक्ष भट्टराईले बताए ।

संस्थाका शेयर सदस्यहरुको उल्लेख्य उपस्थितीमा भएको साधारण सभामा संस्थाका पुर्व अध्यक्ष एंव सल्लाहकार लेखनाथ घिमिरेको प्रमुख आतिथ्यता थियो भने संस्थाका निवर्तमान अध्यक्ष डा वेणुप्रसाद सिटौलाको उपस्थिती रहेको थियो ।

संस्थाले उत्कृष्ट बचतकर्ता पुरस्कारबाट इटहरी ५ का हेमन्त थपलिया, उत्कृष्ट ऋणी पुरस्कारबाट कृष्णध्वज तामाङ्ग र सरिता चौधरी साथै उत्कष्ट बर्ष कर्मचारीबाट कार्यलय सहायक रामप्रसाद पौडेत तथा बर्ष उत्कृष्ट बजार प्रतिनिधि पुरस्कारबाट प्रतिक आचार्यलाई नगद, दोसल्ला र प्रमाणपत्र सहित सम्मान गरेको छ । संस्थाको जेष्ठ सेयर सदस्य सम्मान तर्फ नारायण प्रसाद खतिवडा र पदमकुमारी भुजेल परेका छन् भने उत्कृष्ट बर्ष विद्यार्थी पुरस्कार तर्फ विश्व आदर्श माविमा अध्ययनरत विद्यार्थीद्धय दिवस चुवान र सुजाता घिमिरेले पुरस्कार पाएका छन् ।

संस्थाका संचालक समिति सचिव गणेश दुलालले संचालन गरेको कार्यक्रममा उपाध्यक्ष टिकादेवी पौडेलले स्वागत मन्तव्य राखेकी थिइन भने साधारण सभा संचालन अध्यक्ष दिनेशकुमार भट्टराईको सभापतित्वमा सम्पन्न भएको थियो ।