सहकारी सञ्चालकलाई बोलाएर हर्क साम्पाङ्गले दिए निर्देशन, विकास समिति गठन गर्न माग

प्रकाश बन्जारा
धरान : धरान उपमहानगरका नगरप्रमुख हर्क साम्पाङ्गले नगरभरीका सहकारी सञ्चालक र व्यवस्थापकलाई बोलाएर नियम र ऐन विपरित नजान निर्देशन दिएका छन् ।

बराह बचत तथा ऋण सहकारी संस्थाले हजारौं सदस्यको करोडौं रकम फिर्ता गर्न नसकेको समस्याको साक्षी बनेको धरान उपमहानगरले नगरभरीका सहकारी संस्थालाई भेला गरेर ऐन विपरित नजान निर्देशन गरेको हो ।

नियम अनुसार चलेका सहकारीहरुमा समस्या नभएको र नियम विपरीत चलेका केही सहकारीको कारण समग्र सहकारीहरुलाई समस्या भएको नगरप्रमुख साम्पाङ्गले बताएका थिए । छलफलमा मेयर साम्पाङले कोपोमिस सिस्टममा धरानका ८८ वटा सहकारीमध्ये ३७ वटाले मात्र हिसाब पठाएकोले धेरैले नियम पालना गरेको नदेखिएको बताए । मेयर साम्पाङले नियत खराब भएका सहकारीमा नियम कडा भएपनि समस्या आउने बताएका थिए ।

भेलामा जिल्ला सहकारी संघका वरिष्ठ उपाध्यक्ष दिनेश श्रेष्ठले सहकारीहरु मात्र होइन, विश्वमा नै अर्थिक मन्दीको कारण सबै क्षेत्र प्रभावित भएको धारणा राखेका थिए । सहकारीकर्मीहरुले नगरमा सहकारी विकास समिति गठनको माग समेत गरेका थिए । श्रेष्ठले कम्तीमा ५ करोड रुपैँयाको सहकारी कोष खडा गर्न समेत माग गरेका छन् ।

कार्यक्रममा बोल्दै नगर सहकारी समन्वय समितिकी अध्यक्ष मिशन लामाले पनि अनगुमन, नियम, दर्ता र खारेजीको लागि निगरानी गर्न विभाग गठन नभएको भन्दै सहकारी विकास समिति चाडो गठन गर्न आग्रह गरेकि छन् ।