ज्योतिपुञ्ज सहकारीलाई उत्कृष्ट व्यवसाय पुरस्कार

ललितपुर : ज्योतिपुञ्ज बचत तथा ऋण सहकारी संस्था लिमिटेडले उत्कृष्ट व्यवस्या पुरस्कार प्राप्त गरेको छ । ललितपुर जिल्ला बचत तथा ऋण सहकारी संघले २८औं वार्षिक साधारण सभाको अवसरमा उक्त पुरस्कार प्रदान गरेको हो ।

राष्ट्रिय सहकारी महासंघका अध्यक्ष मिनराज कडेलले संस्थाका प्रमुख कार्यकारी अधिकृत नवराज कार्की र प्रबन्धक रञ्जु कार्कीलाई उक्त पुरस्कार प्रदान गरेका थिए ।

संस्थाको कुमारीपाटी स्थित कार्यालयले संघमा नियमित कारोबार गर्दै आएको छ । आर्थिक वर्ष २०७८/७९ को कारोबारबाट संस्थाले उत्कृष्ट व्यवसाय पुरस्कार प्राप्त गरेको हो ।

आर्थिक वर्ष २०७८/७९ मा ३ हजार ५ सय ८४ सदस्यको १० करोड ५२ लाख रुपैयाँ सेयर पुँजी रहेको छ । संस्थाको जगेडा कोषमा ९ करोड ९३ लाख रहेको छ भने कुल संस्थागत पुँजी १० करोड ८६ लाख र अन्य कोषमा २ करोड ६५ लाख रहेको छ ।

संस्थाले १ अर्ब ३० करोड निक्षेप संकलन गरी १ अर्ब ५६ करोड कर्जा प्रवाह गरेको छ ।