एकपछि अर्काे सहकारीमा समस्या आउन थालेपछि ऐन संशोधन गर्न समिति गठन

प्रकाश बन्जारा
इटहरी : सहकारी संस्थाहरुमा एकपछि अर्को गरी समस्या आउन थालेपछि इटहरी उपमहानगरपालिकाले स्थानीय सहकारी ऐनमा कडाई गर्न तत्परता देखाएको छ । उपमहानगरपालिकाको १ सय २२ औँ कार्यपालिका बैठकमा नगरप्रमुख हेमकर्ण पौडेलले नगरपालिकाको सहकारी ऐनमा संशोधन गर्नुपर्ने र नागरिकको निक्षेपको सुरक्षा गर्नुपर्ने भन्दै समिति गठनको प्रस्ताव राखेका थिए ।

सहकारीसंस्थालाई व्यवस्थित गर्न इटहरी उपमहानगरपालिकाले सहकारी ऐनलाई संसोधन गर्न नगरप्रमुख संयोजक, उपप्रमुख सह संयोजक, सदस्यमा प्रमुख प्रशासकिय अधिकृत साथै कार्यपालिकाले तोकेका २ जना कार्यपालिका सदस्यमा भिमा राई र रतन कार्कीको नाम पारित भएको छ । त्यसैगरी संयोजकको मनोनित गरेका सहकारी सम्बन्धि अनुभव संगालेका नगरक्षेत्रका ३ जना रहने बताइएको छ ।

नगरप्रमुख पौडेलले गंगा दाहाल, बिमला श्रेष्ठ र भोला बस्नेतको नाम प्रस्ताव गरेका छन् भने उक्त नाम कार्यपालिकाले पारित गरेको छ । सहकारीको आर्थिक अनुशासन नभएको र निक्षेपमा तलमाथि गर्नेलाई कारबाही गर्नु उक्त ऐनलाई संसोधन गर्नुपर्ने मेयर हेमकर्ण पौडेलले बताए ।

सहकारीको आर्थिक अनुशासन राम्रो नभएका सहकारीलाई कठाइ गर्न र सर्वसाधारणको निक्षेपको सुरक्षा गर्न यो ऐनको संसोधन गर्नुपर्ने आवश्यकता रहेको पौडेलले औलाएका थिए । आफु निर्वाचित भइसकेपछि पनि २ वटा सहकारीमा समस्या आएर कारबाहिको प्रक्रियामा रहेको बताउँदै मेयर पौडेलले इटहरी उपमहानगरभित्र रहेका सहकारीको दर्ता , नियमन र निरिक्षणका उक्त समिति गठन गरिएको बताए ।