सदस्यको नक्कली हस्ताक्षर गरी रकम निकाल्ने कर्मचारी पक्राउ, ४६ लाख हिनामिना गरेको आरोप

विराटनगर : सुन्दरहरैंचा नगरपालिकास्थित कनकलक्ष्मी बचत तथा ऋण सहकारी संस्थाको ४६ लाख ८७ हजार ९ सय ८५ रुपैयाँ हिनामिना गरेको आरोपमा संस्थाका कर्मचारी विवेक खवास पक्राउ परेका छन् ।

सुन्दरहरैंचा नगरपालिका–७ गोठगाउँका २४ वर्षीय विवेक खवासलाई इलाका प्रहरी कार्यालय बेलबारीले गरेको हो । उनीमाथि ४६ लाख ८७ हजार ९ सय ८५ रुपैयाँ हिनामिना गरेको आरोप लागेको छ । तर, खवासले ३१ लाख रुपैयाँ हिनामिना गरेको स्वीकार गरेका छन् । छानबिन समितिले भने ४६ लाख ८७ हजार ९ सय ८५ रुपैयाँ हिनामिना गरेको प्रतिवेदन तयार पारेको छ ।

खवास गोठगाउँमा रहेको सेवा केन्द्रमा कार्यरत थिए । संस्था सञ्चालक समितिले खवासलाई बर्खास्त गरेर सञ्चालक समिति सचिव यमप्रसाद सिग्देलको संयोजकत्वमा छानबिन समिति बनाएको थियो । समितिको सदस्यमा लेखा समिति संयोजक युवराज आचार्य र लेखा प्रमुख विराटचन्द्र पोखरेल थिए ।

बचतकर्ताको रकम आफै नक्कली हस्ताक्षर गरेर लाखौं रकम हिनामिना गरेको सञ्चालक समितिको आरोप छ । सफ्टवेयरको प्रयोगबाट कारोबार हुने गरे पनि उनले सफ्टवेयरको प्रयोग नै नगरी नक्कली कागजात बनाई रकम लाने गरेको छानबिनबाट खुलेको छ ।