नवजीवन सहकारीका अध्यक्षद्वारा ७८ जना नक्कली ऋणी खडा गरी सवा करोड हिनामिना

सिन्धुपाल्चोक : नवजीवन साना किसान कृषि सहकारी संस्था हेलम्बु–७ का अध्यक्ष टंकप्रसाद गजुरेलले ७८ जना नक्कली ऋणी खडा गरी १ करोड १८ लाख ३ हजार ३ सय ७७ रुपैयाँ कर्जा देखाई हिनामिन गरेको तथ्य खुलेको छ ।
छानविन समितिले संस्थाको चारखाता, सेयर सदस्यहरुको खाता र अन्य सम्बन्धीत अभिलेखहरु अध्ययन तथा निरिक्षण गर्दा नक्कल ऋणी खडा गरी उक्त रकम हिनामिना गरेको तथ्य खुलेको हो ।

समितिले छानविन गर्दा १५४ जना सदस्यहरुमा १ करोड ५३ लाख ४० हजार २ सय ७८ रुपैयाँ लगानी गरेको भेटिएको थियो । उक्त ऋणी मध्ये ७८ जना नक्कल ऋणी भएको प्रमाणित भएको थियो ।

हेलम्बु गाउँपालिले २०७७ भदौ १८ गते निराजन मैनालीको संयोजकत्वमा पाँच सदस्यीय छानविन समिति बनाएको थियो । उक्त समितिले नियामक निकाय हेलम्बु गाउँपालिकालाई २०७८ पुष १३ गते प्रतिवेदन समेत बुझाईसकेको छ ।
छानविनमा सञ्चालक समितिको बैठक समेत किर्ते गरिएको भेटिएको छ ।

नक्कली ऋणी खडा गरि सहकारीको रकम हिनामिन गर्ने अध्यक्ष गजुरेललाई सिन्धुपाल्चोक प्रहरीले पक्राउ समेत गरेको छ । उनलाई प्रहरीले पक्राउ गरी जिल्ला अदालत, सिन्धुपाल्चोकबाट म्याद थप गरी अनुसन्धान भइरहेको जिल्ला प्रहरी कार्यालय, सिन्धुपाल्चोकका प्रहरी उपरीक्षक रामेश्वर प्रसाद यादवले सहकारीखबरलाई जानकारी दिनुभयो ।

अध्यक्ष गजुरेलेले गाउँको सोझा साझा व्यक्तिको नाममा ऋण देखाइ रकम चलाउने र अन्य व्यवसायमा लगाउनदेखि चर्को ब्याजमा ऋण दिने समेत गरेको बुझिएको छ ।

संस्था स्वंयमले पनि २०७७ भदौमा गठन गरेको छानविन समितिले पनि अध्यक्षले हिनामिना गरेको भेछिएको थियो । त्यतिबेला ८० लाख ४४ हजार ७१ रुपैयाँ एक वर्ष भित्र तिर्ने प्रतिवद्धता जनाएको थियो ।

२०६५ मंसिर ५ गते स्थापना भएको संस्थाले २०७५ सालदेखि साधारण सभा समेत गरेको छैन । आ.व. २०७४/०७५ देखि लेखा परिक्षण समेत भएको छैन ।

यस हिनामिना प्रकरणमा संस्थाका प्रबन्धक शर्मिला भट्टराईको पनि संलग्नता रहेको समितिको निष्कर्ष छ ।