सहकारीको बलियो पुँजी र जनशक्तिलाई उद्यमशीलतामा जोडौं : मन्त्री पौडेल

काठमाडौं : शिक्षा, विज्ञान तथा प्रविधि मन्त्री देवेन्द्र पौडेलले सहकारीको बलियो पुँजी र जनशक्तिलाई उद्यमशीलता तथा रोजगारीमार्फत मुलुकको समृद्धितर्फ लान सकिने बताउनुभएको छ । त्यसका लागि नीतिगत तथा कानुनी अड्चन समाधान गर्न सक्दो सहयोग गर्ने प्रतिबद्धता समेत व्यक्त गर्नुभएको छ ।

राष्ट्रिय सहकारी महासंघ, नेपालको आयोजनामा आजबाट सुरु भएको ‘नेशनल युथ फोरमः कोअपरेटिभ अन्ट्रप्रेनियरसीप २०२२’ मा बोल्दै मन्त्री पौडेलले समृद्धिको बाटोमा हिड्ने अब युवा नै रहेको बताउनुभयो ।

‘युवाहरुको काँधमा मुलुकको समृद्धिको जिम्मेवारी आएको छ । तपाईहरु अघि बढ्नुस हाम्रो साथ र सहयोग रहनेछ’, उहाँले भन्नुभयो । मुलुकमै प्रचुर सम्भावनालाई विदेशीहरुले देखेको तर नेपालीहरु स्वयंले नदेखेको भन्दै युवाहरुलाई सम्भावना खोज्ने अभियानमा सहकारीलाई सारथी बनाउन उहाँले आग्रह गर्नुभयो ।

‘लागिपर्यो भने पुँजी जुट्छ, ‘मन्त्री पौडेलले भन्नुभयो, ‘युवाहरुमा इच्छाशक्ति, जागरुकता, क्रियाशीलता र अनुशासन आवश्यक छ, बाँकी अड्चनहरुले रोक्न सक्तैन ।’