ब्याजदर विभाग एक्लैले तोक्ने विषय हैन, सम्पूर्ण निकायसँग छलफल गर्छौं : रजिष्ट्रार पण्डित

काठमाडौं : सहकारी विभागका रजिष्ट्रार रुद्र प्रसाद पण्डितले आज (सोमबार) पदबहाली गर्नुभएको छ । सहकारी विभागमा एक कार्यक्रमको बीच उहाँलाई कर्मचारीहरुले स्वागत गरेका थिए ।

सहकारीखबरसँगको छोटो कुराकानीमा रजिष्ट्रार पण्डितले बैंकहरुले निक्षेपमा ब्याजदर बढाएसँगै सहकारीलाई समस्या परेको, सन्दर्भ ब्याजदरका कारण निक्षेपमा ब्याजदर बढाउन नसकिएको र सहकारीको पैसा बैंक तथा वित्तीय संस्थामा जान थालेको गुनासो आएको बताउनुभएको छ । सहकारीको ब्याजदर सहकारी विभाग एक्लैले तोक्ने विषय नभएको हुँदा सम्पूर्ण निकायसँग छलफल गरेर निर्णय गरिने बताउनुभयो ।

ब्याजदरका विषयमा अर्थ मन्त्रालय, राष्ट्र बैंक, सहकारी मन्त्रालय र सहकारी अभियानसँग अनौपचारिक रुपमा छलफल भएको समेत उहाँले बताउनुभयो ।

सम्बन्धीत निकायसँगको छलफल गरेर मात्र यस विषय टुंगो लाग्ने उहाँको भनाई थियो ।