अब पोखरामा पनि शिव शिखर सहकारीको आफ्नै एटिएम बुथ

काठमाडौं : भक्तपुरको कौशलटारमा मुख्य कार्यालय रहेको शिव शिखर बहुउद्देश्यीय सहकारी संस्थाले पोखरामा पनि एटिएम बुथ राखेको छ ।

सदस्य सेवा केन्द्र पोखरामा संस्थाले राखेको यो दोस्रो एटिएम बुथ हो । यस अघि संस्थाले भक्तपुरको कमलविनायक सेवा केन्द्रमा पहिलो एटिएम बुथ राखेर सदस्यलाई सेवा प्रदान गर्दै आएको थियो ।

संस्थामा आवद्ध सदस्यहरुको सहजतालाई ध्यानमा राखेर संस्थाले आफ्नै एटिएम बुथ सञ्चालनमा ल्याएको संस्थाका मुख्य प्रबन्धक लिलानाथ गौतमले जानकारी दिनुभयो ।

संस्थाको एटिएम कार्ड प्रयोग गरेर नेपालको जुनसुकै बैंक तथा वित्तीय संस्थाहरुको एटिएम बुथबाट पनि रकम लिकाल्न सकिने उहाँले बताउनुभयो । संस्थाको एटिएम कार्डबा नेपालमा मात्र नभई छिमेकी मुलुक भारतबाट समेत रकम निकाल्न मिल्ने उहाँले बताउनुभयो । सदस्यलाई बैंकिङ कारोबारमा सुबिधा प्रदान गर्न र क्यासलेस कारोबारलाई बढवा दिन संस्थाले एटिएम सेवालाई निरन्तरता दिएको जनाइएको छ ।

संस्थाले सञ्चालन गरेको मोबाईल बैकिङ सेवा ४ हजार सदस्यले प्रयोग गर्दै आएको गौतमले जानकारी दिनुभयो । सदस्यले संस्थासँग बैंकिङ कारोबारका लागि कार्यालय धाइरहनुपर्ने झन्झटबाट मुक्ति दिलाएको मुख्य प्रबन्धक गौतमको भनाई छ ।