बहुउद्देश्यीय केन्द्रीय संघमा चर्कियो विवाद, खास विवाद के हो ?

काठमाडौं : नेपाल बहुउद्देश्यीय केन्द्रीय सहकारी संघमा सञ्चालकहरु बीच विवाद उत्पन्न हुँदा साधारण सभा नै अन्यौल भएको छ ।

पौष २९ गतेको लागि तय भएको निर्वाचन सहितको साधारण सभाको विवाद नियामक निकाय सहकारी विभागसम्म पुगेको छ । नियामक निकाय सहकारी विभागले पौष मसान्त भित्रै साधारण सभा गर्न लिखित निर्देशन समेत दिएको छ ।

पौष १९ गते बसेको सञ्चालक समितिको बैठकमा सदस्यता दिने विषयमा विवाद उत्पन्न भएपछि तत्काल अर्को बैठक बस्नेगरी स्थगित गरिएको थियो । त्यस लगत्तै नियामक निकाय सहकारी विभागमा केही सञ्चालकले पौष २० गते उजुरी दिएका थिए । उजुरी परेपछि सहकारी विभागले संघलाई पत्र काटेर पौष मसान्त भित्रै साधारण सभा गरी सो को जानकारी दिन निर्देशन दिएको थियो ।

सहकारी विभागमा उजुरी परेपछि संघका सञ्चालकहरु बीच विवाद उत्पन्न हुन थालेको हो । उजुरी परेपछि तोकिएको समयमा साधारण सभा गर्न नसकिने सूचना संघले जारी गरेको छ । उक्त सूचनामा संघका अध्यक्ष सुरेन्द्र भण्डारीेको हस्ताक्ष रहेको छ । साधारण सभा स्थगित गर्ने निर्णय नभएको भन्दै केही सञ्चालकहरुले आपत्ति समेत जनाएका छन् ।

खास भएको के हो ?

साधारण सभाको तयारी पूर्व तयारी, संघको सदस्यता प्रदान, १० वटा विषयहरुमा छलफल गर्न पौष १९ गते बैठक बोलाईएको थियो । उक्त बैठकमा नयाँ सदस्यताको लागि २८ वटा सहकारीको प्रस्ताव पेश गरिएको थियो । सोही विषमा केही सञ्चालकले आपत्ती जनाएपछि विवाद शुरु भएको हो ।

निर्वाचन सहतिको साधारण सभाको मुखमा आएर सदस्यता प्रदान गर्न नहुने विषय केही सञ्चालकले उठाएका थिए । सदस्यता प्रदान गर्ने विषय कुनै पनि निर्णयबाट बन्द नगरिएको र २० गतेसम्म आएका फाईलहरुलाई सदस्यता दिने प्रस्ताव अध्यक्ष भण्डारीले गरेपछि विवाद शुरु भएको स्रोतले जानकारी दिएको छ । सोही विषयमा धेरै विवाद उत्पन्न भएपछि बैठक तत्काल बस्नेगरी स्थगित भएको थियो । विवाद सुरु भएकै भोलीपल्ट सहकारी विभागमा उजुरी परेपछि हालसम्म आधिकारीक रुपमा बैठक हुन सकेको छैन ।

तोकिएकै समयमा साधारण सभा हुने सूचना

सहकारी विभागले पौष भित्रै साधारण सभा गरेर सो को जानकारी दिन निर्देशन दिएपछि संघको विवादले अर्को रुप लिएको छ । पौष २५ गते अध्यक्ष विना नै बैठक बसी (बहुमत सञ्चालकहरुको बैठक भनिएको) तोकिएकै समयमा साधारण सभा गर्ने निर्णय गरेको छ ।

संघले आज (पौष २६ गते) एक राष्ट्रिय दैनिक पत्रिकामा सूचना जारी गर्दै तोकिएकै समयमा साधारण सभा हुने जनाएको छ । संघका सचिव माधव प्रसाद तिमल्सिनाको हस्ताक्षरित सूचना जारी गर्दै पौष २८ गतेभित्र प्रतिनिधि पठाउन समेत सदस्यलाई अनुरोध गरेको छ ।