तरलताको अवस्था मजबुत छः राष्ट्रिय सहकारी बैंक

काठमाडौं : तरलता संकटको अवस्थामा समेत राष्ट्रिय सहकारी बैंकले सदस्यहरुलाई सहज रुपमा बचत फिर्ता एवम् कर्जा लगानी गरिरहेको राष्ट्रिय सहकारी बैंकले जनाएको छ ।

बैंकले विज्ञप्ति जारी गर्दै २०७८ मंसिर २५ गतेको वित्तीय विवरण अनुसार बैंकको तरलता अवस्था १७.७३ प्रतिशत र कर्जा निक्षेप अनुपात ७९.१६ प्रतिशत (शेयर पूँजी तथा कोषको रकम बाहेक) कायम रहेको जनाएको छ ।

“नेपाल राष्ट्र बैंकले गरेको व्यवस्था अनुसार सिडी रेसियो ९० प्रतिशतसम्म हुनुपर्छ । तर, बैंकमा नियामकीय व्यवस्था भन्दा झन्डै ११ प्रतिशत सहज अवस्थामा छ”, विज्ञप्तिमा भनिएको छ ।

साथै नेपाल राष्ट्र बैंकले तोकेको न्यूनतम पूँजीकोष अनुपात (सिएआर) ८ प्रतिशत हुनुपर्नेमा बैंकको पूँजीकोष अनुपात ९.५१ प्रतिशत रहेको जनाएको छ । जसले बैंकको वित्तीय अवस्था मजबूत रहेको देखाउँछ ।

केही मिडियामा प्रकाशित भएको भ्रामक एवम् तथ्यहीन समाचार प्रति बैंकको गम्भीर ध्यानाकर्षण भएको विज्ञप्तिमार्फत जनाएको छ। बैंकको बारेमा भ्रम सिर्जना गर्ने उद्देश्यबाट भएका गतिबिधिहरुप्रति सचेत हुन सम्पूर्ण सहकारीकर्मी एवम् सरोकारवालाहरुलाई बैंकले अनुरोध समेत गरेको छ ।