सकियो चौथो ललितपुर साकोस समिट, ११ बुँदे घोषणापत्र जारी

गोदावरी, ललितपुर

११ बुँदे घोषणा पत्र जारी गर्दै चौंथो ललितपुर साकोस समिट २०७८ गोदावरीमा सम्पन्न भएको छ । ललितपुर जिल्ला बचत तथा ऋण सहकारी संघले आयोजना भएको सम्मेलन बचत तथा ऋण सहकारी अभियानलाई सुदृढ, दिगो एवम् मर्यादित बनाउने उद्देश्यसहित समापन भएको हो ।

उपराष्ट्रपति नन्दबहादुर पुनले उद्घाटन गर्नुभएको समिटको समापन बागमती प्रदेशका मुख्य मन्त्री राजेन्द्र पाण्डेको प्रमुख आतिथ्यमा आज भएको हो । जिल्ला बचत तथा ऋण सहकारी संघ लि।का अध्यक्ष रामहरि बजगाईको अध्यक्षतामा सम्पन्न समिटले साकोस अभियानलाई मार्गनिर्देशित गर्ने गरी घोषणा पत्र जारी गरेको हो ।

उक्त घोषणा पत्र अभियानको शीर्ष निकाय, विषयगत केन्द्रित निकायसँगै नियामक निकायलाई पनि बुझाइने जानकारी समापन कार्यक्रममा गराइएको थियो । ४ वटा समूहमा विभक्त गरी सहभागीहरुको सुझावहरु समेतलाई आधार गरी ११ बुँदे घोषणा पत्र जारी गरिएको हो ।