हाम्रो साकोसको २३औं तथा एकीकृत साधारण सभा सम्पन्न, कुल सम्पत्ती १ अर्ब ४८ करोड लाघ्यो

काठमाडौं : ललितपुर लगनखेल स्थित हाम्रो बचत तथा ऋण सहकारी संस्थाको २३ औं वार्षिक साधारण सभा तथा एकीकृत साधारण सभा शनिबार सम्पन्न भएको छ ।

संस्थाका अध्यक्ष शम्भुप्रसाद फुयाललको अध्यक्षतामा सम्पन्न साधारण सभाको प्रमुख अतिथि राष्ट्रिय सहकारी महासंघका अध्यक्ष मिनराज कंडेल रहनुभएको थियो । त्यस्तै सभामा बागमती प्रदेश सहकारी संघका अध्यक्ष रामशरण शर्मा घिमिरे, ललितपुर जिल्ला बचत तथा ऋण सहकारी संघका अध्यक्ष रामहरि बजगाई लगायतको आतिथ्यता रहेको थियो ।

साधाणर सभाले संस्थाका अध्यक्ष शम्भुप्रसाद फुयालले प्रस्तुत गर्नुभएको वार्षिक प्रतिवेदन, लेखा तथा सुपरिवेक्षण समितिको तर्फबाट संस्योजक नारायण थापाले प्रस्तुत गर्नुभएको प्रतिवेदन र कोषाध्यक्ष विदुरप्रसाद तिमल्सिनाले प्रस्तुत गर्नुभएको आर्थिक प्रतिवेदन तथा प्रस्तावित बजेट पारित गरेको छ । त्यस्तै साधारण सभाले विभिन्न विषय उपर छलफल गरी पारित गरेको छ ।

संस्थाले कात्तिक २७ गतेबाट साधारण सभा सुरु गरेको थियो । कात्तिक २७ गते महाँकाल गाउँपालिकाको गोटिखेल, ३० गते चापाँगाउँमा सभा सम्पन्न गरेको थियो ।

२०७८ असार मसान्तसम्ममा संस्थामा कुल ५ हजार ९ सय ३२ जना सदस्य आवद्ध भएका छन् । १४ करोड ६५ लाख ७९ हजार सेयर पुँजी रहेको संस्थाले अघिल्लो आ.व.मा १ अर्ब १२ करोड ५२ लाख ८७ हजार रुपैयाँ बचत संकलन गरेको थियो । सोही अवधिमा संस्थाले १ अर्ब १९ करोड ३ लाख ७२ हजार रुपैयाँ कर्जा लगानी गर्न सफल भएको थियो । त्यस्तै संस्थाको कुल सम्पत्ती १ अर्ब ४८ करोड ९७ लाख ४ हजार ३ सय रुपैयाँ पुगेको छ ।

संस्थाले हालसम्म तीन वटा सहकारी एकीकरण सम्पन्न गरिसकेको छ । २०७६ मंसिर ३० गते हाम्रो नमुना बचत तथा ऋण सहकारी, हाम्रो थैली बचत तथा ऋण सहकारी र सेवक बचत तथा ऋण सहकारी संस्था एकीकरण भई हाम्रो बचत तथा ऋण सहकारीको नामबाट कारोबार गर्दै आएको छ । संस्थाले जनजागरण बचत तथा ऋण सहकारी संस्थासँग पनि एकीकरण प्रक्रिया अघि बढाएको छ ।