८ अर्बकाे ठगीमा ४६ कराेडकाे मात्र प्रमाण, थप प्रमाण बाेकेर सिआइबी जाँदै सदस्य

काठमाडौं : प्रहरी अनुसन्धान केन्द्रीय ब्युरो (सिआइबी)ले सिभिल समूहका अध्यक्ष इच्छाराज तामाङसहित १२ जनालाई पक्राउ गरेको छ ।

सहकारीको सदस्यकाे अर्बौं बचत रकम ठगी गरेको भन्दै तामाङलाई सिआइबीले पक्राउ गरेको हो । पक्राउ पर्नेहरुमा संविधानसभाका सदस्य एवं सिभिल ग्रुपका अध्यक्ष इच्छाराज तामाङ, सिभिल सहकारीका अध्यक्ष केशवलाल श्रेष्ठ र विजय शाहसहित १२ जना रहेका छन् । तामाङसहित सबैलाई उनीहरुकै कार्यालयबाट पक्राउ गरेको हो ।

सिभिल सेभिङ एण्ड क्रेडिट सहकारी संस्थाले अर्बौँ रुपैयाँ ठगी गरे पनि ४६ करोड रुपैयाँ ठगी गरेको प्रमाणसहित उजुरी सीआईबीमा छ । उनीहरु पक्राउ परेपछि पीडितहरु मंगलबार नै थप उजुरी लिएर प्रहरीसमक्ष पुग्ने तयारी गरेको छ । त्यसपछि मात्र सिभिल सहकारीले कति ठगी गरेको भन्ने पुष्टि हुन्छ ।

सिआइबीका अनुसार तामाङसहित २८ जना विरुद्ध सिआइबीमा उजुरी छ । प्रारम्भिक चरणमा ७५ जनाले उजुरी दिएका छन् । आज थप पिडित सदस्यले उजुरी दिने तयारी गरेका छन् ।

उनीहरुलाई सम्पति सुद्धिकरणमा समेत छानबीन गर्ने सिआइबीको तयारी छ ।