सहकारीका तीन नेता ‘सहकारी विकास बोर्ड’मा नियुक्त

हेटौंडा : बागमती प्रदेश सहकारी विकास बोर्डका सहकारी क्षेत्रबाट थप तीन जना सदस्य नियुक्ती भएको छ । प्रदेश सहकारी संघका अध्यक्ष रामशरण शर्मा घिमिरे, बागमती प्रदेश सहकारी संघका अध्यक्ष उद्धव सापकोटा र जिल्ला सहकारी संघ, काठमाडौंका अध्यक्ष ज्ञानबहादुर तामाङ सदस्यमा नियुक्ती हुनुभएको हो ।

प्रदेश सहकारी ऐन २०७६ अनुसार प्रदेश सहकारी संघका अध्यक्ष स्वतः सदस्य हुनेछ । त्यस्तै प्रदेश विषयगत संघका अध्यक्षहरु मध्येबाट निर्वाचित एक जना सदस्य र जिल्ला सहकारी संघका अध्यक्षहरु मध्येबाट निर्वाचित एक जना सदस्य हुने व्यवस्था छ ।

उहाँहरु २ वर्षका लागि नियुक्ती हुनुभएको हो ।

बोर्डको अध्यक्ष भूमि व्यवस्था, कृषि तथा सहकारी मन्त्री हुने व्यवस्था छ । त्यस्तै सहकारी क्षेत्रमा १५ वर्ष अनुभव प्राप्त व्यक्ती प्रदेश सरकारले नियुक्ती गर्ने व्यवस्था छ । सोही अनुसार बोर्डको उपाध्यक्षमा नारायण देवकोटा नियुक्ती हुनुभएको थियो ।

बोर्डमा अध्यक्ष, उपाध्यक्ष र सदस्य सचिवसहित १३ सदस्यीय हुने व्यवस्था छ । सदस्य सचिव पनि सहकारी क्षेत्रबाटै नियुक्ती हुने व्यवस्था छ । १३ सदस्यीय बोर्डमा सहकारी क्षेत्रबाट ८ जना नियुक्ती हुनेछ ।