फलोअप : भोलीबाट सदस्यको बचत फिर्ता गर्दैै रारा साकोस

विराटनगर : विराटनगर–७, स्थित रारा बचत तथा ऋण सहकारी संस्थाले सदस्यहरुको बचत फिर्ता गर्ने भएको छ । संस्थाले सोमबारबाट सदस्यको बचत फिर्ता गर्ने जनाएको छ ।

संस्थाका अध्यक्ष शेरबहादुर थापा मगरका अनुसार सोमबारबाट सदस्यको बचत फिर्ता गरिने बताउनुभयो । संस्थाले गरेको लगानी उठ्न नसक्दा समस्या उत्पन्न भएको बुझिएको छ । संस्थामा सदस्यको बचत करिब १० करोड रुपैयाँ रहेको छ । संस्था समस्याग्रस्त अवस्थामा पुगेको जानकारी पाएपछि सदस्यहरु आफ्नो बचत फिर्ता लिन लागि परेका छन् ।

बचत फिर्ता गराउन नसके पनि विभिन्न बहानामा कार्यालय बन्द गरिएको थियो । शुक्रबार कार्यालय खुलेको भएपनि रकम भुक्तानी गर्न संस्थाले नसकेको अध्यक्ष शेरबहादुर थापा मगर स्विकार गर्नुहुन्छ । सदस्यहरुले प्रहरी कार्यालयमा समेत उजुरी दिईसकेका छन् । प्रहरी कार्यालयले छलफलको लागि संस्थाका प्रतिनिधिलाई बोलाएका छन् ।

संस्थाका अध्यक्ष मगरका अनुसार लगानी उठ्न नसक्दा समस्या आएको बताउँछन् । करिब १२ करोड रुपैयाँ ऋण लगानी उठ्न नसकेको बताउनुभयो । ‘सदस्यको बचत फिर्ता गराउने नै छौं’, उहाँले भन्नुभयो, ‘अहिले संस्थामा पैसा छैन । हामी म्यानेज गर्दै छौं ।’