सहकारीका सदस्यको ८० लाख रुपैयाँ लिएर समूहकी अध्यक्ष फरार

कञ्चनपुर : साना किसान सहकारी संस्था पिपलाडीका समूहकी अध्यक्ष कलावती दमाई (नेपाली) सदस्यको लाखौं रकम लिएर फरार भएकी छन् । साना किसान र नेपाल ग्रामीण विकास लघुवित्त वित्तीय संस्था झलारीबाट विभिन्न व्यक्तिका नामबाट झण्डै ८० लाख रुपैयाँ रकम झिकेर उनी बेपत्ता भएकी हुन् ।

शुक्लाफाँटा नगरपालिका–१ बन्साहाकी कलावतीलाई खोजी तथा आवश्यक कारबाही गरी रकम असुल उपर गर्न प्रहरीमा वडा कार्यालयले पत्राचार गरेको छ ।

सहकारी र वित्तीय संस्थामा रकम बचत गर्दै आएका व्यक्तिका नाममा रहेको रकम समूह जमानीका आधारमा ऋणका रुपमा उनले झिकेकी बताईएको छ ।

वडा कार्यालयमा उत्तरा विष्टलगायत २७ जनाले खोजतलास र रकम असुल उपर गरिदिन लागि भन्दै संयुक्त निवेदन दिएका थिए । सोही निवेदनका आधारमा वडा कार्यालयले प्रहरीलाई पत्राचार गरेको हो ।

कलावती लामो समयदेखि सम्पर्कविहीन भएपछि पीडित स्थानीयले खोजतलासका लागि वडा र प्रहरीलाई गुहारेका हुन्।