डिजिटल दुनियाँमा सहकारी प्रवेश, अन्तर सहकारी कारोबार सुरु

काठमाडौं : नेपालमा पहिलोपटक अन्तर सहकारी कारोबार सुरु भएको छ ।

एउटा सहकारीको पे स्लिप (चेक) अर्को सहकारीबा पनि साट्न मिल्ने व्यवस्था सहित अन्तरसहकारी कारोबार सुरु भएको हो । हब कोअपरेटिभ सर्भिस लिमिटेले देशभरका सहकारीहरुमा सहकार्य गरी यस्तो सेवा सुरु गरेको हो ।

सहकारी ऐन २०७४ र सहकारी नियमावली २०७५ मा भएको व्यवस्था अनुसार हब कोअपरेटिभ सर्भिसले अन्तर सहकारी कारोबार सुरु गरेको हो । सहकारी विभागबाट विनियम स्वीकृत गरेर देशभर कार्यक्षेत्र रहेको हबको अपरेटिभले मुलुकमै पहिलोपटक विद्युतीय भुक्तानीसहितको नयाँ सेवा दिन लागेको हो ।

हबमा सहकारी संस्थाहरुले सदस्यता लिएपछि आफ्ना सदस्यलाई यस्तो सेवा दिन सक्नेछ । बैंकहरूको चेक नेपाल क्लियरिङ हाउसले सेटलमेन्ट जस्तै एक सहकारीको चेक अर्को सहकारीबाट हबले सेटलमेन्ट गरेर सटही गर्ने व्यवस्था मिलाएको छ। अहिलेसम्म एउटा सहकारीको चेक अर्को सहकारीमा साट्ने व्यवस्था थिएन । सहकारीलाई बैंकसँग प्रतिस्पर्धी बनाउन नयाँ सेवा सुरु गरेको हब कोअपरेटिभ सर्भिसका अध्यक्ष दक्ष पौडेलले बताउनुभयो । हबमा आबद्ध सहकारी संस्थालाई डिजिटल सेवा प्रदान गर्ने उहाँले बताउनुभयो ।

हबले मोबाइल बैंकिङ, अनलाइन भुक्तानी सेवा, युटिलिटी पेमेन्ट, क्युआर कोडमार्फत भुक्तानी, आन्तरिक तथा बाह्य रेमिटेन्स सहितका सेवा दिने उहाँले बताउनुभयो ।

हबले सहकारीमार्फत आन्तरिक रेमिटेन्स र बाह्य रेमिटेन्स सेवा पनि दिने छ ।