सहकारी बैंकले सदस्यको खातामा पठायो १५ प्रतिशत लाभांश

काठमाडौं : राष्ट्रिय सहकारी बैंक लिमिटेडले आ.व. २०७६/०७७ को कारोबारबाट सदस्य सहकारी संघ/संस्थाहरुलाई १५ प्रतिशत लाभांश वितरण गरेको छ । बैंकको १७ औं वार्षिक साधारणसभा सकिए कै दिन शुक्रबार बैंकले लाभांश सदस्य संघ/संस्थाको खाता पठाएको हो ।

‘साधारणसभाले १५ प्रतिशत लाभांश दिने निर्णय पारित गरेको छ’, बैंकका अध्यक्ष के.बी.उप्रेतीले भन्नुभयो, ‘आज साधारणसभा सकिदैछ, लाभांश पनि आजै सहकारीहरुको खातामा पठाएका छौ ।’ बैंकले यसपटकको साधारणसभा एकाईगत रुपमा ७ वटै प्रदेशमा गरेको थियो ।

एकाई प्रतिनिधिहरुको साधारणसभा शुक्रवार जुममार्फत सम्पन्न भएको र अध्यक्षको सल्लाह अनुसार शुक्रबार नै देशभरका सहकारीहरुको खातामा लाभांश पठाइएको बैंकका प्रमुख कार्यकारी अधिकृत बद्रीकुमार गुरागाईले जानकारी दिनुभयो ।

बैंकले गत आर्थिक वर्षको कारोबारबाट २७ करोड ७८ लाख रुपैया लाभांश वितरण गरेको छ । सहकारी बैंकले विगत ३ वर्षदेखि लगातार १५ प्रतिशत लाभांश प्रदान गर्दै आएको छ । बैंकले शुक्रबार नै एक विज्ञप्ती प्रकाशित गरी बैंकसंग कारोबार गर्ने सम्पूर्ण सदस्य संघ संस्थाहरुलाई धन्यवाद ज्ञापन गरेको छ । बैंकसंग कारोबार गर्ने संघ संस्था तथा सहयोग र समन्वय गर्ने सम्पूर्णमा धन्यवाद ज्ञापन गरिएको छ । शेयर लाभांश खातामा पठाइएको छ, संरक्षित पूँजिफिर्ता कोषको रकम पनि छिटै पठाउने बैंकले जनाएको छ ।

बैंकले लाभांश बाहेक कारोबारका आधारमा संरक्षित पूँजिफिर्ता कोषबाट पनि सदस्य सहकारीहरुलाई रकम उपलब्ध गराउदै आएको छ । संरक्षित पूँजिफिर्ताकोषको रकम कारोबारको आधारमा दिइने र उक्त रकम केही समय पछि प्रदान गरिने गुरागाईले बताउनुभयो ।

बैंकले गत वर्षको कारोबारबाट १२ करोड ७३ लाख रुपैया संरक्षित पूँजिफिर्ता कोषबाट बैंकसंग कारोबार गर्ने सहकारी संघ संस्थाहरुलाई प्रदान गर्ने भएको छ । यस भन्दा अगाडि आ.व. २०६५/०७६ को कारोबारबाट ९ करोड ३५ लाख र २०७४/०७५ को कारोबारबाट ४ करोड ४३ लाख रुपैया संरक्षित पूँजिफिर्ता कोषबाट रकम प्रदान गरिएको थियो ।