विकू बचतकाे सम्पत्ति ४४ प्रतिशतले बढ्याे, १९ कराेड मुनाफा आर्जन

गैंडाकोट, ५ मंसिर

विकू बचत तथा ऋण सहकारी संस्था लिमिटेडले आर्थिक वर्ष २०७६/०७७ मा १९ करोड १ लाख ८२ हजार सञ्चालन मुनाफा गर्न सफल भएको छ । संस्थाकाे आम्दानी ५८ करोड २ लाख ८५ हजार र ४० करोड ४ लाख ३३ हजार खर्च भएको संस्थाका कोषाध्यक्ष कालिदाश गौडेलले बताउनुभ!यो ।

अघिल्लो आर्थिक वर्षको तुलनामा करिब ४४ प्रतिशतले कुल सम्पत्तिमा वृद्धि गरेको छ । संस्थाको ५ अर्ब ६७ करोड ५१ लाख कुल सम्पत्ति पुगेको छ । विकूमा कार्तिक मसान्तसम्म ७१ हजार १ सय बढी शेयर सदस्य पुगेका छन् भने कुल शेयर पुँजी ५८ करोड २ लाख नाघेको संस्थाले सार्वजनिक गरेको आर्थिक प्रतिवेदनमा उल्लेख गरिएको छ ।

विकूले अघिल्लो आर्थिक वर्षको तुलनामा आर्थिक वर्ष २०७६/०७७ मा निक्षेप संकलनमा करिब ४८ प्रतिशतले वृद्धि गरेको छ । संस्थाको निक्षेप संकलन ४ अर्ब ६० करोड ७१ लाख रहेको छ ।

विकूले २०७६/७७ मा ७ हजार ७ सय ९० जना शेयर सदस्यहरुलाई ऋण लगानी गरेको छ । विकूले सो वर्ष ७ हजार बढी सदस्यहरुका लागि करिब ३ अर्ब १६ करोड बढी ऋण लगानी गरेको छ ।

विकू बचत तथा ऋण सहकारी संस्थाको ३१ औँ साधारण सभा आजदेखि सुरु भएको छ । आजदेखि सुरु भएको वार्षिक साधारण सभा १५ गतेसम्म जारी विकू साकोसका सचिव प्रेमप्रसाद सापकोटाले बताउनुभएको छ ।

विकू साकोसको वार्षिक प्रतिवेदन संस्थाको वेभसाइट तथा सामाजिक सञ्जाल मार्फत पढ्न र हेर्न सकिने गरि व्यवस्था मिलाइएको संस्थाले जनाएको छ । कोरोना भाइरसको संभावित संक्रमणको जोखिमका कारण सहकारी विभागको परिपत्र अनुसार सुरक्षाको मापदण्ड अपनाइ फरक तरिकाले वार्षिक साधारण सभाको आयोजना गरिएको विकू साकोसका अध्यक्ष ओमप्रसाद सापकोटाले बताउनुभयो । यसैगरी शनिबार विहान ११ बजेबाट विजय एफएम लगायत चितवन नवलपुरका ८ वटा रेडियो स्टेशनबाट साधारणसभाका प्रतिवेदनहरु सुन्न सकिने संस्थाले जनाएको छ ।

मंसिर १५ गतेसम्म वेभसाइट, सामाजिक सञ्जाल अथवा रेडियो स्टेशनबाट प्रसारण हुने वार्षिक प्रतिवेदनहरु सुनेर अथवा केन्द्रीय कार्यालय र सेवा केन्द्रमा पुगि वार्षिक प्रतिवेदन बुझी आफ्ना सुझाबहरु लिखित अथवा मौखिक रुपमा राख्न सकिने व्यवस्था मिलाइएको विकूका प्रमुख अधिकृत माधवप्रसाद पौडेलले बताउनुभएको छ ।