विश्व सहकारी सम्मेलन स्थगित

काठमाडौं, ३० भदौ

अन्तर्राष्ट्रिय सहकारी महासंघको ११ सेप्टेम्बरमा बसेको ग्लोबल बोर्डले सन् २०२१ को १ देखि ३ मार्चमा हुने भनिएको विश्व सहकारी सम्मेलन २०२१ को डिसेम्बरसम्मका लागि स्थगित भएको छ ।

कोभिड १९को महामारीको संक्रमणका कारण आइसीएले दोस्रो पटक कंग्रेस स्थगित गरेको हो । राष्ट्रिय सहकारी महासंघका वरिष्ठ उपाध्यक्ष तथा आइसएका ग्लोबल बोर्ड सदस्य ओमदेवी मल्लले २९ नोभेम्बरदेखि ३ डिसेम्बरसम्म गर्ने गरी स्थगित भएको बताउनुभयो ।

साथै अन्य दुुई प्रारम्भिक इभेन्टहरु समेत स्थगित गरिएको बताउनुभयो । शुरुमा सन् २०२० को ११ देखि १७ डिसेम्बरसम्म गर्ने मिति तय भएको थियो । सम्मेलन भने कोरियामा नै हुने छ ।

त्यसैगरी आइडेन्टिटी कमिटीले सहकारी सिद्धान्तका विषयमा गरेको आइसीए गाइड लाइनको मस्यौदालाई बोर्डले आवश्यक परिमार्जन गरी अर्को साधारण सभामा पेश गर्ने निर्णय गरेको मल्लले बताउनुभयो । त्यसैगरी बोर्डले जि २० सहभागी गु्रपमा सहकारी अभियानले गरेको योगदानको विषयमा जानकारी गराउने निर्णय भएको छ ।

‘जि २० समिटले गर्नुपर्ने कतिपय विषयमा सहकारी अभियानले योगदान गरेको विषयमा जानकारी गराउने निर्णय भयो,’ उहाँले भन्नुभयो । २०२० का अधिकांश बोर्ड बैठक अनलाइन हुने भएको छ । १२ अक्टोबर, १० नोभेम्बर र ९ नोभेम्बरमा अनलाइन बोर्ड बैठक हुने निर्णय भएको मल्लले जानकारी गराउनु भयो ।

बैठकले आइसीएको अनलाइन बैठक लगायतका गतिविधि संचालनका लागि प्रत्येक बोर्ड सदस्यले ५ सय युरो योगदान गर्ने निर्णय भएको महासंघका वरिष्ठ उपाध्यक्ष मल्लले बताउनुभयो ।