सदस्यहरुको कोरोना बिमा गर्दै चन्द्रागिरि साकोस

काठमाडौं, ३ जेठ

थानकोट स्थित चन्द्रागिरि बचत तथा ऋण सहकारी संस्थाले सदस्यहरुको कोरोना बिमा सुरु गरेको छ ।

संस्थाको सहजीकरणमा बिमा गराउन इच्छुक सम्पूर्ण सदस्यहरुको कोरोना बिमा गर्ने संस्थाले जनाएको छ । शनिबार बेलुकासम्म बिमाको लागि नाम दर्ता गराउने सदस्यहरु मध्ये ७१ जनाको बिमा गरिसकेको संस्थाका प्रमुख कार्यकारी अधिकृत कृष्णकुमार श्रेष्ठले जानकारी दिनुभयो ।

शनिबार मात्रै २ सय जना सदस्य कोरोना बिमा कराउन नाम टिपाएको र आईतबार बिमा गरिने प्रमुख श्रेष्ठले बताउनुभयो । सदस्यहरुले फोन सम्पर्क वा एस.एम.एस. पठाई आफ्नो नाम दर्ता गराउन सकिने जनाएको छ ।

चन्द्रागिरि नगरपालिका सिल गरिएको कारणले कार्यालय सेवा जेठ ६ गतेसम्म स्थगित गरिएता पनि बिमाको लागि नाम दर्ता गराउन बाधा नपर्ने उहाँले बताउनुभयो । बिमा कम्पनीबाट संस्थाको पहलमा ४० प्रतिशत छुट प्राप्त भएको समेत जनाएको छ । बाँकी बिमा वापत लाग्ने रकम भने सदस्यले तिर्नुपर्नेछ । संस्थाले सदस्यहरुको लागि सजताको लागि सहजिकरण गरेको श्रेष्ठको भनाई छ ।

त्यस्तै संस्थाका सम्पूर्ण कर्मचारीको कोरोना बिमा भने यसअघि नै गराई सकेको छ । चन्द्रागिरि नगरपालिका शिल भएका कारण संस्थाबाट हुने नियमित सेवालाई स्थगित गरेको छ ।