फुड बैंकमा एक दर्जन सहकारीको सहयोग

काभ्रे, २४ चैत

जिल्लाको पनौती नगरपालिकाले स्थापना गरेको राहत संकलन केन्द्र (फुड बैंक) मा सहकारीहरु सहयोग गरेका छन् ।

विपतको समयमा दैनिक हातमुख जोर्न समस्यमा रहेका नगरिकहरुलाई सहायता वितरण गर्ने उद्देश्यले पनौती नगरपालिका बिपद जोखिम न्यूनिकरण तथा ब्यवस्थापन समितिले स्थापना भएको केन्द्रमा सहकारी संस्थाहरुले स्वास्थ्य जन्य सामाग्री खाद्यन्न सहयोग प्रदान गरेका हुन् ।

पनौती नगरपालिका विपद जोखिम न्यूनिकरण तथा ब्यवस्थापन समितिले नगरक्षेत्रमा सहायताको नाममा कसैले पनि आफुखुशी चन्दा उठाउन नदिने, आफुखुशी राहत वितरण गर्न नपाउने वितरण प्रणालीमा एकरुपता ल्याउनका लागि इन्देश्वर प्राथामिक विद्यालयमा केन्द्रको स्थापना गरेको हो ।

सहकारी संस्थाहरु, व्यापारिक प्रतिष्ठान तथा विभिन्न संघ/संस्थाहरुले स्वास्थ्य सामाग्री तथा खाद्यन्न सामाग्रीहरु उपलब्ध गराउँदै आएको पनौती नगरपालिका विपद् जोखिम न्यूनिकरण तथा ब्यवस्थापन समितिका सदस्य सचिव प्रेमकुमार सोनामले जानकारी दिनुभयो ।

केन्द्रमा पनौती नगरपालिकामा स्थापना भएका तथा नगरपालिका भित्र सेवा कार्यालय संचालन गरेकासहकारीहरुले राहत सामाग्री उपलब्ध गराउँदै आएका छन् । सामुदायिक साकोस, जनमैत्री साकोस, रोशी साकोस, एकिकृत साकोस, इन्द्रेश्वर साकोस लगायतका करिब १ दर्जनसहकारी संस्थाहरुले स्वास्थ्य सामाग्री, खाद्यन्न, तरकारी र दैनिक उपभोग्य सामाग्रीहरु उपलब्ध गराएका छन् । विपत ब्यवस्थापनमा सहकारीको सहकार्य प्रशंसनिय रहेको छ ।

केन्द्रमा संकलन भएका खाद्य सामाग्रीमा आवश्यकता अनुसार नगरपालिकाले थप ब्यवस्थापन गरी वडा मार्फत वितरण गर्ने व्यवस्था रेहको सदस्य सचिव सोनामले बताउनुभयो ।