सहकारी महासंघले कर्मचारीलाई भन्यो, ‘घर बसेररै काम गर्नु’

काठमाडौं, ९ चैत

राष्ट्रिय सहकारी महासंघका कर्मचारीले घरबाटै काम गर्ने भएका छन् । विश्वभरि नै महामारीका रुपमा फैलिरहेको कोरोना भाइरस (कोभिड १९) को जोखिमलाई मध्येनजर गर्दै घरबाटै काम गर्ने व्यवस्था मिलाईएको महासंघका महाप्रबन्धक चित्राकुमारी थाम्सुहाङ सुब्बाले जानकारी दिनुभयो ।

कार्यालयमा जाँदा आउँदा भीडभाड हुने र एक जनालाई संक्रमण भएमा अर्कालाई सर्ने सम्भावना बढी देखिएकाले घरबाटै काम गर्दा प्रभावकारी हुने महासंघको ठहर छ ।

महासंघका कर्मचारीहरुलाई अत्यावश्यक काममा बाहेक घरबाहिर ननिस्कन, अर्को सूचना जारी नभएसम्म कुनै पनि वैदेशिक भ्रमण नगर्न, आफ्नो जिम्मेवारीमा परेका कार्यक्रमहरु समेत स्थगित गर्न र नियमित रुपमा सम्पर्कमा रहन निर्देशन गरिएको उहाँले बताउनुभयो ।

यसका साथै कोरोना भाइरसको संक्रमणको जोखिम न्यूनिकरण गर्न र कर्मचारीको स्वास्थ्यलाई मध्यनजर राख्दै भयरहित वातावरणमा काम गर्ने व्यवस्था महासंघले मिलाइएको छ । यसका लागि राष्ट्रिय सहकारी महासंघले आफ्नो कर्मचारीलाई भीडभाडमा नजान र घरबाट नै काम गर्ने व्यवस्थासमेत मिलाएको छ ।आफ्नै सवारी साधन नभएका कर्मचारी सहित करिब ८० प्रतिशत कर्मचारीहरूलाई घरमै बसेर काम गर्ने व्यवस्था मिलाइएको उहाँले बताउनुभयो।

महासंघले जोखिम न्यूनिकरणका लागि कर्मचारीलाई माक्स, सेनिटाइजरसमेत उपलब्ध गराइएको छ । कर्मचारीलाई आर्थिक समस्यासमेत पर्न नदिने व्यवस्थाका साथै सकेसम्म डिजिटल कारोबार गर्न समेत प्रोत्साहन गरेको उहाँले बताउनुभयो । साथै महासंघ कर्मचारी परिवार कोरोना भाइरसको संक्रमणको जोखिमबाट सम्पूर्ण सहकारी संघ÷संस्थामा कार्यरत कर्मचारीहरूलाई सावधानी अपनाउन समेत अपिल गरेको छ ।