क्रियाशील लालीगुराँस बहुउद्देश्यीय सहकारीले चलायो बस

बागलुङ (गलकोट) २२ माघ ।

बागलुङको काठेखोला गाउँपालिका–८ लेखानीमा क्रियाशील लालीगुराँस बहुउद्देश्यीय सहकारी संस्थाले बस सेवा सञ्चालनमा ल्याएको छ ।

सहकारी ऐन २०७४ को व्यवस्थाअनुसार बस सेवा शुरु गरिएको सो सहकारीले जनाएको छ । संस्थाको शेयर सदस्यलाई लक्षित गरी ३२ सिट क्षमताको बस सेवा सञ्चालन ल्याइएको संस्थाका अध्यक्ष कृष्ण छन्त्यालले जानकारी दिए ।
‘बहुउद्देश्यीय सहकारीले नयाँ कार्यको थालनी गरेका हौं’, उनले भने, ‘सदस्यले अन्यत्रका जिप तथा बसमा खर्च गर्ने रकम संस्थाले प्रदान गर्ने बस सेवा लिँदा दुवैलाई फाइदा हुने छ ।’

बागलुङ बजारदेखि बिहुँसुल्डाँडा हुँदै लेखानीसम्म सेवा प्रदान गर्न थालेको छ । सो स्थानसम्म सदस्यलाई ११० र अन्य यात्रुलाई १४० भाडा लिइने सहकारीका अध्यक्ष छन्त्यालले जानकारी दिए । लालीगुराँस बहुउदेश्यीय सहकारीमा एघार सय शेयर सदस्य र एक करोड ५८ लाख शेयरपूँजी रहेको छ ।