बहुउद्देश्यीय सहकारीबाट २५ अर्बभन्दा बढी पूँजी परिचालन भएको छ : अध्यक्ष भण्डारी

काठमाडौं, २० मंसिर ।

नेपाल बहुउद्देश्यीय केन्द्रीय सहकारी संघ लिमिटेडका अध्यक्ष सुरेन्द्र भण्डारीले २५ अर्बभन्दा बढीको पूँजी परिचालन भएको बहुउद्देश्यीय सहकारीको दीर्घकालीन विकास र संस्थागत सुशासन अपरिहार्य रहेको बताएका छन् । बहुउद्देश्यीय सहकारीलाई प्रभावकारी रुपमा कार्यान्वयन गर्दै केन्द्रिय संघ अघि बढेको बताए ।

देशभर ४ हजार ३ सय ७१ बहुउद्देश्यीय सहकारी संस्था छन् । केन्द्रीय संघ अन्तर्गत १२ संघसहित ३ सय ३४ संघ/संस्था केन्द्रिय संघमा आबद्ध रहेको भण्डारीले बताए । संघको आठौं स्थापना दिवस र सातौं साधारणसभामा अध्यक्ष भण्डारीले संघ अन्तर्गत करिब ४५ हजारलाई रोजगारी दिएको बताए ।

२ करोड चुक्ता पुँजी रहेको संघको करिब ५० करोड रुपैयाँ सम्पत्ती, ४७ करोड निक्षेप, १७ करोड लगानी रहेको भण्डारीले बताए ।

सरकारले जारी गरेको सहकारी ऐन २०७४ र सहकारी नियमावली २०७५ अनुसार सबै बहुउद्देश्यीक सहकारी संस्था संचालन भैरहेको जानकारी दिए । ऐनमा कृषि तथा बहुउद्देश्यीय सहकारीलाई अनिवार्य रुपमा वचत तथा ऋण कारोबार गर्नुपर्ने व्यवस्था प्रति संघको आपत्ती रहेको बताए ।

संघले २०७५–२०७९ (चारवर्षिय) रणनितिक योजना सार्वजनिक गरेको छ । ६ बुँदे रणनीतिको लक्ष्यमा सदस्यता अभियान, पुँजी, बचत तथा ऋण कारोबार, लगानीमा बृद्घि, सेवा प्रवाह–परामर्श, तालिम, सफ्टवेयर, कागजात सेवा जस्ता विभिन्न सेवाहरुमा अभिबृद्घि, मानव स्रोत व्यवस्थापन तथा क्षमता अभिबृद्घि, पूर्वाधार विकास र संस्थागत सुसासन रहेका छन् ।