सहकारीखबर डटकम स्थापनाको ७ औं वर्षमा प्रवेश

नेचुरल मिडियाद्वारा सञ्चालित सहकारीखबर डटकम स्थापनाको ७ औं वर्षमा प्रवेश गरेको छ । पत्रकारिताको मूल मर्म, सत्य तथ्य र निष्पक्षतामा आधारित भई सहकारीका हरेक गतिविधि सहकारीखबरले समेट्दै आएको छ । मूलधारका मिडियाले सहकारीका विषयबस्तुलाई प्राथमिकता दिन कन्जुस्याईं गरिरहेको महसुस भइरहेका बेला हामी भने सहकारीको मूलमन्त्र पछ्याउँदै अनवरत यात्रामा छौं ।

हामी सूचनाको युगमा छौँ । अहिलेका हरेक नागरिक सञ्चारको सहज पहुँचमा छन् । पछिल्लो समय नेपालको पत्रकारितामा अनलाइन पत्रकारिता पनि स्थापित हुँदै गएको छ । अनलाइनको सशक्त र रचनात्मक हस्तक्षेप बढेको छ । सहकारीखबर डटकमले अनलाइन मिडियामार्फत सहकारी क्षेत्रमा देखिएका विकृति–विसंगति, त्यस क्षेत्रमा प्राप्त सफलता, राज्यलाई गरेको योगदान, नीतिगत क्षेत्रमा देखिएका कमजोरी र सुधारका पक्ष लगायतबारेमा गहकिला विषय उठान गर्दै आएको छ । स्थापनाको छोटो समयमै अनलाइनले लोकप्रियता हासिल गर्न सफल भएको छ । यो सबै तपाईँ प्रबुद्ध पाठकहरुकै कारण सम्भव भएको हो ।

नेपालको सहकारी अभियानमा सञ्चारमाध्यमको तर्फबाट एक अभियन्ताका रुपमा सहकारीखबर डटकम उभिएको छ । सहकारी क्षत्रको सर्वाधिक लोकप्रिय मिडिया र सहकारीकर्मीको ढुकढुकी बन्न सफल भएको छ । नेपालको सहकारी आन्दोलनलाई द्रुत गतिमा अगाडी बढाउनका लागि सञ्चार क्षेत्रको भूमिका अब निर्णायक भइसकेको छ । यस कुरालाई मनन गरेर हामीले सहकारी क्षेत्रका सफलताका कथा र यसका समस्यालाई मात्र उजागर गरेका छैनौं, सहकारीमा आउन सक्ने सम्भावित संकटका विषयमा समेत सजग गराउने प्रयास गरेका छौं ।

यो यात्रा सहज बनाउन हामी एक्लैको प्रयास कदापि प्रयाप्त थिएन र हुने पनि छैन । सहकारीखबर डट कमको उद्देश्यलाई सफलतापूर्वक यहाँसम्म ल्याइपु¥याउन यहाँहरू सबैको योगदान छ । हामीले यस अवधिमा धेरै संघर्ष, चुनौती, व्यवधान, केही हौसला र अनुपम अनुभव संगालेका छौं । पछिल्लो युगको कान्छो पत्रकारिताका रूपमा स्थापित बन्दै गएको अनलाइन मिडियामार्फत हामीले सहकारी क्षेत्रमा देखिएका केही विकृति, धेरै सफलताका कथा र केही नीतिगत विषयमा गहकिला विषय उठान गर्न सकेको आत्मानुभूति गरेका छौं । हामी अझै परिपक्व भएको दाबी गर्दैनौं, सत्य यत्ति हो कि सहकारीको क्षेत्रमा हामी पहिलो सन्तानका रूपमा स्थापित हुन सकेका छौं । र, यो अवसरमा हामीले पाएको स्थानलाई अझै उचाइँमा पु¥याउने दृढता समेत व्यक्त गर्दछौं ।

आशा छ, यहाँहरुको सहयोग विगतमाझैँ रहने छ । आमपाठकलाई सुसूचित गराउने मूल दायित्वबाट हामी कहिल्यै बिमुख हुने छैनौं । सहकारीखबरले विगतमा निष्पक्ष कभरेजको आमरूपमा जुन प्रशंसा पाएको छ, त्यसले हामीलाई जिम्मेवारपूर्ण र व्यवसायिकरुपमा अघि बढ्न थप ऊर्जा दिएको छ । नेपालको अर्थतन्त्रको तेस्रो खम्बाको रुपमा रहेको सहकारी क्षेत्रले थुप्रै चुनौतीको सामना गरिरहेको छ । ती चुनौतीविरुद्ध लड्दै सहकारीलाई अर्थतन्त्रको मेरुदण्डका रुपमा अगाडि बढाउन सक्ने सम्भावनालाई जनतामाझ छर्लङ्ग पार्ने माध्यम भनेकै सञ्चार क्षेत्र हो । सञ्चार क्षेत्रको विकास र विस्तारबिना सहकारीको सम्भावना छैन । सहकारी क्षेत्रलाई संस्थागत गर्न सहकारीकर्मीलाई घचघच्याउनका साथै सहकारी क्षेत्रका विकृतिलाई निरुत्साहित गर्न हामी कटिवद्ध छौं । यति भनिरहँदा सहकारी मूल्य र मान्यताका पक्षमा हाम्रो पहरेदारी अझ बलियो गरी हुने प्रण पनि यही अवसरमा पुनः दोहो¥याउन चाहन्छौं ।

अन्त्यमा, सहकारीखबर डटकम ७ औं वर्ष प्रवेशको यो अवसरमा विशेषगरी हाम्रो आरम्भका सहयात्री लगायत सबै शुभेच्छुक, सहयोगी हात र हौसलाप्रति आभार प्रकट गर्न चाहन्छ । विशेषगरी श्रद्धेय पाठक, सिर्जनशील पत्रकार, लगनशील कर्मचारी, सहयोगी सहकारी संघ संस्था, विज्ञापनदाता र एजेन्सीलगायतमा हामी कृतज्ञ छौं ।

२०१३ साल चैत २० गते बाट सुरु नेपालको सहकारी आन्दोलन ६२ औं वर्षमा प्रवेश गरेको अवसरमा सम्पूर्ण सहकारीकर्मीमा हार्दिक शुभकामना दिन चहान्छौं । सहकारी मूल्य, मान्यता र सिद्धान्तलाई सहकारी सञ्चालकले व्यवहारिक रुपमा अवलम्बन नगर्दा तथा नियमन निकायले चासो नदिँदा केही सहकारीमा समस्या देखिएको छ । तिनलाई बेलैमा समाधान गरेर अगाडि बढेमा सुखद र सुन्दर भविष्य प्रतिक्षारत छ ।

जय सहकारी ।

सहकारी खबर तथा नेचुरल मिडिया परिवार