म्याग्दीमा एकै पटक पाँच सहकारी गाभिए

म्याग्दी, १ चैत

म्याग्दीका पाँच वटा सहकारी संस्था बीच एकीकरण (मर्ज) भएको छ ।

मालिका गाउँपालिकामा दरबाङ रहेको पश्चिम दरबाङ साकोस, फूलबारी साकोस, बेनीको कामना साकोस, मंगलाको बाबियाचौर बहुउद्देश्यीय सहकारी र बेनी–४ स्थित सिंगा उपभोक्ता सहकारी संस्था तातोपानी बीच एकीकरण भएको हो । एकीकृत साधारणसभाले संस्थाको नाम पश्चिम दरबाङ बचत तथा ऋण सहकारी संस्था राख्ने निर्णय गरेको छ ।

साधारणसभाले सुरेन्द्रराज शर्माको अध्यक्षतामा ११ सदस्यीय सञ्चालक, ऋण र लेखा समिति चयन गरेको छ ।

मर्जपछि संस्थाको तीन हजार ८ सय जना सदस्य भएको छ । संस्थाको सेयर पुँजी ५ करोड ७९ लाख ३८ हजार १ सय ९ रुपैंयाँ रहेको छ । चालु आर्थिक वर्षको हालसम्मको निक्षेप संकलन ३० करोड ६५ लाख २३ हजार ८ सय ८५ र ३२ करोड ७० लाख २ हजार ४ सय ५० रुपंैयाँ कर्जा लगानी छ ।