सदस्यलाई साली नदी भ्रमण गराउँदै चन्द्रागिरी सहकारी

काठमाडौं, १७ माघ

थानकोट स्थित चन्द्रागिरी बचत तथा ऋण सहकारी संस्थाले गराउँदै आएको साली नदी भ्रमणमा सदस्यहरुले उल्लेख्य सहभागिता जनाएका छन् ।

साली नदी मेला (स्वस्थानी व्रत) शुभारम्भ भएदेखि हालसम्म संस्थाले चौथो पटक सदस्यहरुलाई भ्रमण गराएको छ । हालसम्म २ सय ५० सदस्यले साली नदीको दर्शन तथा भ्रमण गरेको संस्थाका प्रमुअ कार्यकारी अधिकृत कृष्णकुमार श्रेष्ठले जानकारी दिए ।

‘सबै सदस्यहरुलाई साली नदी भ्रमणको लागि आव्हान गरिएको छ’, श्रेष्ठले भने, ‘सदस्यहरुको माग बमोजिम मेला अवधिभर भ्रमण गराउने छौं ।’

चन्द्रागिरी सहकारीले हरेक वर्ष सदस्यहरुलाई धार्मिक भ्रमण गराउँदै आएको र यस वर्ष महिना दिन भर इच्छुक सदस्यलाई साली नदीको दर्शन गराउने श्रेष्ठले बताए । चन्द्रागिरीको ‘सदस्य सम्बन्ध व्यवस्थापन’ कार्यक्रम अन्तर्गत यस भ्रमण कार्यक्रम राखिएको श्रेष्ठले बताए ।

स्वस्थानी व्रत एक महिनासम्म अर्थात् माघ शुक्ल पूणिर्मासम्म चल्दछ । पौष शुक्ल चतुर्दशीको दिन हात गोडाका नङ काटी स्नान गरी शुद्ध वस्त्र पहिरिएर यसको शुरुवात हुन्छ ।