महेश्वर महर्जनलाई शैलभा सहकारीको सम्मान

काठमाडौं, २८ पुस

शारीरिक सुगठन खेलाडी महेश्वर महर्जन सम्मानित भएका छन् ।

नेपालका लागि अन्तराष्ट्रिय शारीरिक सुगठ प्रतियोगितामा पहिलो स्वर्ण पदक विजेता महेश्वरलाई शैलभा बचत तथा ऋण सहकारी संस्थाले सम्मान गरेको हो ।

शुक्रबार शैलभाको १० औं वार्षिक साधारणसभाबाट ‘शैलभा सेवा सम्मान–२०७५’ बाट नागर्जुन नगरपालिकाका मेयर मोहनबहादुर बस्नेत र शैलभाका अध्यक्ष बिक्रम श्रेष्ठले संयुक्त रुपमा सम्मान गरेका हुन् ।

महर्जनले थाइल्याण्डको चाङमाइमा गत डिसेम्बरमा भएको १० औँ विश्व शारीरिक सुगठन तथा स्पोर्ट्स फिजिक च्याम्पियनसिपको शारीरिक सुगठनतर्फ पुरुष ७५ किलो तौलमा स्वर्ण पदक जितेका थिए ।

त्यस्तै उपासना महिला सहकारीका अध्यक्ष अमरावती महर्जन पनि सम्मानित भएकी छिन् । शैलभा सहकारीले सदस्यहरुलाई सितापाईला र न्युरोडबाट वित्तीय सेवा प्रदान गर्दै आएको छ । १० बार्षिक साधारणसभासम्म आईपुग्दा संस्थाले करिब ५० करोडको कारोबार गर्दै आएको छ ।