सहकारी बैंकको शाखा धनकुटामा, जिल्लाका सबै सहकारी आवद्ध गराउने लक्ष्य

ललितपुर । देशभरका सहकारी संघ संस्थाको प्रवद्र्धनका क्षेत्रमा क्रियाशिल राष्ट्रिय सहकारी बैंक लिमिटेडले सोमबारदेखि प्रदेश नं. १ को धनकुटामा सेवा सुभारम्भ गरेको छ ।
नेपाल राष्ट्र बैंक र सहकारी विभागबाट यस आर्थिक वर्षमा ७ वटा थप शाखा सञ्चालनको अनुमति पाएको बैंकले धनकुटा बजारमा शाखा स्थापना गरी कारोबार शुभारम्भ गरेको हो ।
जिल्लामा सहकारी बैंकको शाखा नहुदाँ वार्षिक ३/४ अर्बको कारोबार सदस्य नभएका वित्तीय संस्थामा गर्नु पर्ने बाध्यता अब हट्ने शाखा समन्वय उपसमितिका संयोजक तथा जिल्ला सहकारी संघ धनकुटाका राष्ट्रिय प्रतिनिधि खगेन्द्र सुवेदीले बताए ।
धनकुटाका १ सय १० वटा सहकारी बैंकमा आवद्ध भएका छन्, शाखा स्थापनापछि जिल्लाका सबै सहकारीलाई आवद्ध गराउने योजना रहेको शाखा प्रमुख सिद्धिकुमार श्रेष्ठले बताए ।
हाल धनकुटामा सहकारी बैंकमा आवद्ध सहकारीहरुको शेयर रकम १४ लाख रहेको छ ।
सहकारी बैंकले धनकुटासंगै पाँचथर जिल्लाको फिदिम, सर्लाही जिल्लाको हरिवन र महोत्तरी जिल्लाको बर्दिवासमा शाखा सञ्चालनका लागि गत कात्तिकमा अनुमति पाएको थियो । अनुमति पाएसंगै शाखा सञ्चालनका लागि आवश्यक तयारी शुरु गरिएको र सबै ठाउँमा कारोबार सञ्चालनका तयारी भैरहेको बैंकले जनाएको छ ।
बैंकले फागुन १० गते नेपाल राष्ट्र बैंकबाट थप ३ वटा शाखा सञ्चालनको समेत अनुमति प्राप्त गरेको छ । चितवन जिल्लाको भरतपुर, नवलपरासी जिल्लाको कावासोती र नवलपुर जिल्लाको बर्दघाटमा शाखा सञ्चालनको अनुमति पाएको र तीन वटै स्थानमा शाखा सञ्चालनका लागि आवश्यक तयारी भैरहेको बैंकका प्रवन्ध सञ्चालक के.बी.उप्रेतीले जानकारी दिए ।
यस आर्थिक वर्षमा ७ वटा शाखा थप गरेपछि ४४ वटा शाखा तथा १ कर्पोरेट कार्यालय मार्फत सहकारी संघ/संस्थाहरुलाई सेवा प्रदान गरिने बैंकले जनाएको छ । थप १० स्थानमा शाखा सञ्चालनका लागि नेपाल राष्ट्र बैकमा अनुरोध गरिएको छ ।