'सहकारी महासम्मेलनमा १० हजार तिरेर पछुताउनु पर्ने छैन'

चित्रा कुमारी थाम्सुहाङ्ग सुव्वा, कामु महाप्रवन्धक
राष्ट्रिय सहकारी महासंघ नेपाल

दोस्रो सहकारी महासम्मेलनको तयारीको विषयमा जानकारी गराईदिनुस् न ?
महासम्मेलनमा प्रस्तुत हुने कार्यपत्रहरु प्राप्त भैसकेको छ । उक्त कार्यपत्रको संगालो बनाउने काम भईरहेको छ । सरोकारवाला निकायहरुको सहभागिताका साथै सहकारीकर्मीको लागि नाम दर्ता धमाधम भईरहेको छ । व्यवस्थापनको काम पनि धमाधम भईरहेको छ । अन्तर्राष्ट्रिय सहकारी महासंघ एसिया प्रसान्त क्षेत्रको बोर्ड मिटिङ नेपालमा २३ गते हुँदैछ । मिटिङको पनि तयारी भईरहेको छ ।

महासम्मेलनका उद्देश्य के–के हुन् ?
राष्ट्रिय सहकारी महासंघले २०७० चैत्र ११ देखि १३ गते सम्म प्रथम सहकारी महासम्मेलन सफलतापूर्वक सम्पन्न गरेको थियो । उक्त सम्मेलनले परिकल्पना गरेको धेरै विषयमा हामी सफल भएका छौं । उक्त परिकल्पनाको समिक्षा गर्दै दोस्रा महासम्मेलन गर्न लागेका हौं ।
सम्मेलनबाट नेपालको सहकारी अभियानको हालसम्मका उपलव्धीहरूको सिंहावलोकन हुनेछ । सन् २०३० सम्मको दिगो विकास लक्ष्य प्राप्तिका लागि सहकारी क्षेत्रको सहभागिता तथा योगदानमा वृद्धि गर्ने उद्देश्य रहेको छ । त्यस्तै सरकार तथा सहकारी अभियान एवं सरोकारवाला निकायहरूबीच सुदृढ सम्वन्ध र समन्वयको विकास, सहकारी क्षेत्रको साझा समस्याको पहिचान तथा भावी कार्यदिशा निर्दिष्ट गर्ने, अन्तर्राष्ट्रिय सहकारी महासंघको लक्ष्य अनुरूप सहकारी दशकभित्र सहकारी व्यवसायको सुदृढीकरण लगायत महासम्मेलनको उद्देश्य रहेको छ ।

महासम्मेलनबाट उपलब्धी के हुनेछ ?
नेपालको सहकारी अभियानको दिशा निर्देश हुनेछ । अभियानको मार्ग निर्देश गर्नेछ । सन् २०३० सम्मको दिगो विकास लक्ष्य प्राप्तिमा सहकारी क्षेत्रको योगदानमा वृद्धि हुनुका साथै सहकारी क्षेत्रमा हालसम्म भएका उपलव्धीहरूको पुनर्मुल्यांकन गर्दै संस्थागत हुने अपेक्षा गरेका छौं । सहकारी क्षेत्रमा देखिएका साझा समस्याको पहिचान र समाधानका लागि साझा प्रतिवद्धता प्रकट हुनेछ । सरोकारवाला निकायहरुका बीच समन्वयात्मक सम्बन्धको विकास तथा विस्तार हुनेछ । सहकारी क्षेत्रको लागि क्षेत्रगत विकासका नीतिहरू तर्जुमा गर्न सहयोग पुग्नेछ । सरोकारवाला सरकारी, राष्ट्रिय तथा अन्तर्रा्ष्ट्रिय सहकारी निकायहरूसंगको सम्वन्ध र सहकार्यमा बृद्धि हुनेछ । सहकारीको अन्तरसम्वन्धित विषयहरूउपर छलफल भई तद्नुरूप अघि वढन मद्दत पुग्नेछ ।

महासम्मेलनमा सहभागिताको लागि १० हजार रुपैयाँ निर्धारण गरिएको छ । यो रकम सबैका लागि उपयुक्त छ ?
धेरै व्यक्तिबाट शुल्क महंगो भएको कुरा उठेको छ । अन्तर्राष्ट्रिय स्तरको कार्यक्रम हुने भएकाले पनि दर्ता शुल्क महंगो भएको हो । दुर्गम जिल्लाको सहभागिताको लागि छुटको पनि व्यवस्था गरेका छौं । विभिन्न निकायहरुको सहभागिताको लागि भने हामी शुल्क लिने छैनौं । कार्यक्रम व्यवस्थापन गर्नका लागि उक्त रकम निर्धारण गरेका छौं । महासम्मेलन सकिएपछि शुल्क महंगो भएको गुनासो पक्कै हुने छैन । कार्यक्रम सकिएपछि १० हजार तिरेर पछुताउने पर्ने छैन ।

देशभरका आम सहकारीकर्मीलाई तपाईंको सन्देश के छ ?
महासम्मेलनमा सहभागी हुन अनुरोध गर्दछु । शुल्क मात्र ठूलो कुरा होईन । महत्वपूर्ण विषयहरुमा छलफल हुँदैछ । विदेशमा सहकारी नयाँ नयाँ अवधारण अनुसार सञ्चालन भएका छन् । पहिलो सम्मेलन जस्तै दोस्रो सहकारी महासम्मेलन पनि भव्यताका साथ सफल बनाउन आम सहकारीकर्मीहरुको साथ र सहयोग आवश्यक छ । सम्मेलनमा सहभागी हुन नाम दर्ता नगर्नुभएका सहकारी संघ÷संस्था र सहकारीकर्मीलाई आजै नाम दर्ता गर्नअनुरोध पनि गर्दछु ।