‘कुल ग्राहस्थ उत्पादनमा सहकारीले योगदान बढाउनुपर्छ’

काठमाडौ‌ं । सहकारी तथा गरिबी निवारण मन्त्री हृदयराम थानीले नयाँ सहकारी ऐनपश्चात सहकारीमा समस्या समाधान हुने बताएका छन् ।
सहकारी विभागको आयोजनामा सोमबार राजधानीमा भएको ‘सहकारी व्यवसायको प्रवद्र्न’ बिषयक गोष्ठीमा बोल्दै मन्त्री थानीले सहकारीका समस्या समाधान गर्न ऐनमा स्पष्ट व्यवस्था हुने बताए । ‘सहकारी क्षेत्रलाई मर्यादित र व्यवस्थित हुनेगरी सहकारी ऐन आउँछ’ उनले भने ।
सहकारीमैत्री ऐन ल्याउने संकेत गरेपनि अभियानले भनेजस्तो यो दफा हुनुपर्छ या हुनुहुँदैन भन्ने कुरा मान्य नहुने बताए । तीन खम्बे अर्थनीतिमा सहकारी उल्लेख गरेपनि सबल खम्बा बनाउन अभियान र राज्य संयन्त्रको सहकार्य खाँचो रहेको बताए । सहकारी क्षेत्रको प्रवद्र्धनबिना मुलुकको विकास असम्भव रहेको भन्दै मन्त्री थानीले भने–‘कुल ग्राहस्थ उत्पादनमा सहकारीले योगदान बढाउनुपर्छ ।’
सहकारी क्षेत्रमा देखिएका समस्या समाधान गर्न आफू र आफ्नो मन्त्रालय सदैव तयार रहेको उनको भनाई थियो । सहकारी क्षेत्रको प्रवद्र्धनका निम्ति मन्त्रालय पूर्ण प्रतिवद्ध रहेको उनले उल्लेख गरे ।
कार्यक्रममा मन्त्रालयका संचिव मोहनकृष्ण सापकोटाले सहकारी आन्दोलन अन्तिम चरणमा पुगेको बताउँदै सहकारीलाई व्यवस्थित गर्न सरोकावालाबीच एकरुपताको खाँचो रहेको बताए । रेमिट्यान्स सदुपयोग नभएको भन्दै सचिव सापकोटाले सहकारीको माध्यमबाट रेमिट्यान्सलाई उत्पादनशिल क्षेत्रमा लगाउनुपर्नेमा जोड दिए । उनले भने–‘धेरै पैसा अनुत्पादक क्षेत्रमा खर्च भैइरहेको छ,यसलाई सहकारीको माध्यमबाट उत्पादनशिल क्षेत्रमा लगाउन आवश्यक छ ।’
राष्ट्रिय सहकारी संघका अध्यक्ष केशव बडालले सहकारीको गतिशीलतालाई राज्यले अझैपनि बुझ्न नसकेको बताए । उनले भने–‘सहकारीको गतिशीलतालाई राज्यले बुझ्न नसकेकाले उत्पादन प्रणालीमा जान कठिनाई भएको छ ।’
केन्द्रिय स्वाथ्य सहकारी संघका अध्यक्ष राजेन्द्र पाण्डेले सहकारी मापदण्डलाई फरकिलो बनाउन जरुरी रहेको बताए । पाण्डेले सहकारीलाई पनि वैदेशिक ऋण लिन पाउने व्यवस्था गर्न माग गरे ।