सहकारीलाई कर सहुलियत दिए अहिलेको भन्दा चार गुणा बढी संकलन हुन्छ : उप्रेती

सिमरा । राष्ट्रिय सहकारी बैंकका प्रवन्ध सञ्चालक केबी उप्रेतीले व्यवस्थापिका संसदमा विचाराधिन रहेको सहकारी ऐनलाई अभियानमैत्री बनाउन आग्रह गरेका छन् ।

बिहिबार सिमरास्थित सहकारी बैंकको सिमरा शाखा कार्यालय स्थानान्तरण विशेष कार्यक्रममा बोल्दै उप्रेतीले सहकारीलाई कर सहुलियत दिए अहिलेको भन्दा चार गुणा बढी संकलन गर्न सकिने बताए । उप्रेतीले सिमरास्थित नवनिर्मित हातेमालो बचत तथा ऋण सहकारी संस्थामा कार्यालय समेत उद्घाटन गरेका छन् । सहकारीहरु सामाजिक व्यवसायको रुपमा क्रियाशिल रहेको र समुदायको आर्थिक विकास र समृद्धिका लागि महत्वपूर्ण भूमिका खेलेको बताउँदै त्यसलाई निजी सरह व्यवहार राज्यले गर्ननहुने धारणा राखे ।

कार्यक्रममा बोल्दै नेपाल बचत तथा ऋण केन्द्रीय सहकारी संघ (नेफ्स्कून) का नवनिर्वाचित सञ्चालक डा. कृष्ण पौडेलले सहकारी संघ/संस्थाहरुको प्रवद्र्धन र गुणात्मक विकासका लागि राज्य र सहकारी अभियानले मिलेर काम गर्न जरुरी रहेको बताए । पौडेलले सहकारीहरु सामाजिक व्यवसाय भएकोले समुदायमा उत्तरदायी भएर सेवाको भावनासहित काम गर्न जरुरी धारणा राखे ।