धादिङमा मात्रै एक लाख २१ हजार मानिस सहकारी आवद्ध

धादिङ । सहकारी प्रति अाम नागरिककाे अाकर्षण दिन प्रतिदिन बढ्दै गएकाे छ । समुदायमा छरिएर रहेका स्थानीय स्रोत, साधन र पूँजीहरुलाई एकत्रित गरी व्यवस्थापन गर्ने काम सहकारीले गर्दै अाएकाे छ । सदस्यहरुको आर्थिक, सामाजिक, सांस्कृतिक विकास गर्ने सवल संस्थागत माध्यम नै सहकारी बनेस‌ँगै सहकारीमा अाम नागरिककाे अाकर्षण बढेकाे हाे ।

धादिङ जिल्लाका मात्रै १ लाख २१ हजार एक सय ३८ जना सहकारीमा आबद्ध छन् । जसमध्ये ७१ हजार ४ सय ६९ जना महिला छन् । ८८ वटा महिला सहकारीमा महिलाले मात्रै नेतृत्व गरेका छन् । ६ सय ५३ जना कर्मचारीमध्ये ३ सय ४७ जना महिला कर्मचारी छन् ।

धादिङमा कार्य प्रकृतिअनुसार जिल्लामा दुग्ध उत्पादक १७, कृषि २ सय २७, बहुउद्देश्यीय ३८, बचत तथा ऋण ८९, तरकारी तथा फलफूल १९, विद्युत् ६, सञ्चार ५ र जडीबुटीका ५ विषयगत सहकारी छन् । त्यस्तै सामाजिक उद्यम ४, उपभोक्ता १, चिया तथा कफी १, यातायात १, स्वास्थ्य ३, शिक्षा १, च्याउ १, धातु १ गरी ४ १९ प्रारम्भिक सहकारी संस्था क्रियाशील रहेको डिभिजन सहकारी कार्यालय घादिङले जनाएको छ ।

सबै प्रकृतिका सहकारीहरूले बचत तथा ऋणको कारोबार नगर्ने भएकाले पुँजी परिचालन भने कमै छ । त्यहाँका सहकारीहरुको ५८ करोड ४७ लाख ८३ हजार सेयर पुँजी, ५८ करोड ४७ लाख ८३ हजार विभिन्न कोष, २ अर्ब ९ करोड ५६ लाख ३४ हजार निक्षेप संकलन र १ अर्ब ४२ करोड ७ लाख ५० हजार परिचालन गरी १३ करोड ९४ लाख ६७ हजार खुद नाफा गरेको डिभिजन सहकारी कार्यालयको तथ्यांक छ ।

प्रकाशित मिति: २०७३ भदाै १० गते