नेडाकको गोष्ठी तथा साधारणसभा असार २८ गतेदेखि ३० गतेसम्म काठमाडौंमा हुने

काठमाडौं । कृषि सहकारीहरुको विकास सञ्जाल (नेडाक) को गोष्ठी तथा साधारणसभा असार २८ गतेदेखि ३० गतेसम्म काठमाडौंमा हुने भएको छ ।

एसिया प्यसोफिक क्षेत्रका राष्ट्रहरुको कृषि सहकारीका माध्यमबाट कृषि क्षेत्रको विकासका लागि सरकारको ध्यान अकर्षित गर्न, सदस्य राष्ट्रहरुको आपसी सम्बन्धमा विकास गरी सीप, ज्ञान र सूचना आदान प्रदान गर्न गोष्ठी गर्न लागिएको हो ।

नेडाकमा नेपालका तर्फबाट सहकारी विकास बोर्ड, राष्ट्रिय सहकारी संघ, राष्ट्रिय सहकारी बैंक र कृषि केन्द्रीय सहकरी संघ सदस्य छन् । सो अवसरमा जडिबुटी, मह र ट्राउट माछाका बारेमा कार्यपत्र प्रस्तुत हुने छन् ।

हाल नेडाकमा विभिन्न ८ वटा देशका २० वटा राष्ट्रिय तथा केन्द्रीय निकायहरु छन् । नेडाकमा नेपालबाट ४, भारतबाट ७, थाईल्याण्ड र फिलिपिन्स र बंगलादेशबाट दुईदुई, इरान, श्रीलंका, चिनबाट एकएक वटा निकायले प्रतिनिधित्व गर्छन् ।

हरेक २ वर्षमा हुने साधारणसभा सन् २००३ मा नेपालले पहिलो पटक कार्यक्रम गरेको थियो । यस वर्ष नेडाकले नयाँ नेतृत्वसमेत पाउने छ । पत्रकार सम्मेलनमा बोल्दै राष्ट्रिय सहकारी विकास बोर्डका सहअध्यक्ष सरोजकुमार शर्माले कृषिमा आत्मनिर्भर हुनका लागि सहकारी क्रियाशील हुन आवश्यक भएको बताए । ‘नेपालको अर्थतन्त्र उकास्ने कृषि नै हो, सहकारीले कृषिमा लगानी गर्नुको विकल्प छैन्’ उनले भने ।

राष्ट्रिय सहकारी बैंकका प्रबन्ध सञ्चालक केबी उप्रेतीले बैंकले साढे ६ अर्बको २५ प्रतिशत लगानी कृषिमा गरेको जानकारी दिए । ‘हाम्रो लगानीको प्राथमिकता कृषिमै छ, तर कृषिमा लगानी गर्न केही समस्या छ’ उनले भने । कृषि प्रविधि भित्राउन, नेपाली उत्पादनको ब्रान्डिङ गर्न आवश्यक भएको बताए । राष्ट्रिय सहकारी संघका उपाध्यक्ष ओमदेवी मल्लले सहकारीले पनि एक गाउँ एक उत्पादनको कार्यत्रम सञ्चालन गर्नेे बताइन । गोरखा र लतितपुरमा उक्त कार्यक्रम सञ्चालन भइसकेको उनीको भनाई थियो ।
कृषि सहकारी केन्द्रीय संघका अध्यक्ष खेम पाठकले निर्वाहमुखी खेतीबाट बिस्तारै व्यवसायमुखी बन्दै गएको बताए । उनले आफ्ना सहकारीमार्फत ३५ अर्ब लगानी भएको बताए । ‘बजारको समस्या छ, बजार हुन सक्यो भने कृषिमा लाग्नेको अझ उत्साह बढ्न सक्थ्यो’ उनले भने । खाद्य, उद्योग, कृषि यान्त्रीकरणमामा कृषक आकर्षित भएको उनको भनाई थियो ।