सहकारीले दियाे एक महिनाको सुत्केरी खर्च

कपिलवस्तु । हथिहवा–७ को मदारी रैदासलाई सुत्केरी हुँदा बुहारीलाई के खुवाउने होला भन्ने पीर यस पटक भएन । स्थानीय जगमाया महिला विकास ऋण सहकारीले उनकी बुहारी सुनितालाई एक महिनाको सुत्केरी खर्च दिएको छ ।

दुई वर्षअघि बच्चा जन्मदा सुनिताले राम्रो खाना र आराम पाएनन् । त्यसै कारण पहिलो छोरा दुई वर्षको हुँदा पनि जम्मा ४ किलोको छ ।  अहिलेको बच्चा सप्रिएको मदारी रैदास बताउँछन् । ‘आमाको दूध मात्रै पिउँदा पनि छोरी सप्रिएकी छ’, उनले भनिन ।  महिला तथा बालबालिका कार्यालय कपिलवस्तुले जगमाया सहकारीलाई एक वर्षअघि सुत्केरी पोषण सहायता कोष स्थापना गर्न सहयोग गरेको थियो ।  विपन्न, गरिब समुदायका आमालाई सुत्केरीमा उचित पोषणको व्यवस्था गर्ने उद्देश्यले कार्यालयले उनीहरुलाई जिम्मा दिएको थियो ।

कोषमा परिचालन गरी आएको आम्दानीले यतिखेर हथिहवा गाविसका सबै वडाका विपन्न महिलालाई सुत्केरी पोषण खर्च व्यवस्था गर्ने गरिएको सहकारी संस्थाको अध्यक्ष श्रीकान्ती धोबी बताउँछन् ।  महिला तथा बालबालिका कार्यालयले आर्थिक वर्ष २०७१/७२ मा १५ गाविसको महिला सहकारीलाई कोष व्यवस्थापन गर्न ५५ हजार रुपियाँका दरले रकम सहयोग गरेको थियो ।

गोरखापत्र दैनिकबाट