चन्द्रसुर्य साकोसको स्वास्थ्य शिविर

ललितपुर, २६ जेठ  । सहकारीको सातौं सिद्धान्तको परिपालनमा जोड दिन र व्यावसायिक सामाजिक उत्तरदायित्व वहन गर्ने अभिप्रायले लगनखेलस्थित चन्द्रसुर्य वचत तथा ऋण सहकारी संस्थाले एक दिने स्वास्थ्य शिविर आयोजना गरेको छ ।

ललितपुरको दक्षिणी भेग गोटिखेलमा सम्पन्न सो शिविरबाट ५१२ जनाले प्रत्यक्ष स्वास्थ्य परीक्षणको लाभ लिएका थिए ।  मुटुरोगसँग सम्बन्धित स्वास्थ्य परीक्षण गरिएको यो शिविरमा २७ जनाको इको टेस्ट, ७२ जनाको इ.सी.जी. र १०० जनाको ल्याव टेस्ट गरिएको थियो । शिविरमा स्वास्थ्य परीक्षण गर्न आउनेमध्ये केहिको जटिल रोगहरु समेत पत्ता लागेको थियो ।

नेपाल हार्ट फाउन्डेशन, एच.आर.एल क्लिनिक, जिल्ला जनस्वास्थ्य कार्यालय, गोटिखेल गाविस, स्थानीय विश्वासिलो वचत तथा ऋण सहकारी संस्था लगायतका संस्थाहरुको संलग्नतामा यो शिविर सम्पन्न भएको हो । बरिष्ठ मुटुरोग विशेषज्ञ डा. प्रकाशराज रेग्मी नेतृत्वको टोलीले स्वास्थ्य परीक्षण सम्पन्न गरेको हो ।