बढ्दै छ सहकारी एकीकरण

झापा, ९ जेठ । पछिल्लो पटक सहकारी एकीकरण तर्फ चासो बढ्न थालेको छ । झापा जिल्लामा एकै प्रकृतिका सहकारी संस्थाहरु एकीकरण हुने क्रम बढेको छ । यो वर्ष मात्रै चारवटा सहकारी संस्था एकीकरण भएको डिभिजन सहकारी कार्यालय झापाले जनाएको छ ।

धाइजन–८ स्थित परिचय महिला बचत तथा ऋण सहकारी संस्था र मेचीनगर–४ को भरोसा महिला बचत तथा ऋण सहकारी आपसमा एकीकरण भई परिचय महिला बचत तथा ऋण सहकारी संस्थाका रुपमा रूपान्तरित भएका छन् । त्यस्तै शान्तिनगर–५ को अनमोल सुपारी उत्पादन सहकारी संस्था र शान्तिनगरकै नागबेली कृषि सहकारी संस्था एकआपसमा एकीकरण भई नागबेली सुपारी उत्पादन सहकारी संस्था लिमिटेडका रुपमा एकीकृत गरेका छन् । यसअघि सतासी माहुरी कृषि सहकारी र सतासी कृषि सहकारी संस्थाहरु एकीकरण भई सतासी माहुरी कृषि सहकारी संस्थाका रुपमा रूपान्तरित भएका थिए ।

देशभर झण्डै ३० हजार सहकारी दर्ता भएका छन् भने झापा जिल्लामा मात्रै ७१५ वटा सहकारी संस्था दर्ता भएका छन् ।