सहकारी नै स्थानीयहरूको बैंक

बैतडी, २ वैशाख । आवश्यक परेका बेलामा एक लाख ५० हजारसम्म सस्तो ब्याजदरमा ऋण सहयोग गर्न थालेपछि सहकारी नै स्थानीयहरूको बैंक बनेको छ ।

एकदशक अघि बैतडीको पुरचौडी हाटबाट विस्थापित भएको नेपाल बैंक लिमिटेड र कृषि विकास बैंकको अभाव भोग्दै आएका स्थानीय बासिन्दालाई अहिले सहकारीले राहत प्रदान गर्दै आएको छ ।

विसं २०६४ मा स्थापना भएको कोपिला बचत तथा ऋण सहकारीले सस्तो व्याजदरमा ऋण दिन थालेपछि सहकारी नै स्थानीयहरूको बैंक बनेको हो । सहकारीमा हालसम्म २ सय ६० जना सेयर सदस्य रहेका छन् भने करिब २८ लाख ऋण लगानी गरेको सहकारीकी सदस्य रायमती धानुकले बताए ।

नियमित बचत गरी कार्य क्षेत्र विस्तार गर्दै गएको सहकारीले अहिले स्थानीयका लागि विस्थापित बैंकको ठाउँमा राहत प्रदान गर्दै आएको सहकारीका सचिव पुष्कर धानुकले बताए ।

सरकारले एक लाख अनुदान दिन थालेपछि जिल्लाका ६२ गाविसमा स्थापना भएको विभिन्न सहकारी निष्क्रिय भएका बेला सो सहकारी संस्था भने फस्टाउँदै गएको छ ।

सहकारीबाट ऋण लिएर हाट, कोटिला र मल्लादेहीका दर्जनौं बासिन्दाले आआफ्नो व्यवसायसमेत सुरु गरेका छन् । व्यापार व्यवसाय, कुखुरापालन, तरकारीखेती, घरेलु उद्योगलगायतका क्षेत्रमा सहकारीले लगानी गरेको छ भने आवश्यक परेको समयमा सेयर सदस्यले चाहेअनुसारको ऋणसमेत पाउने गरेको सचिव धानुकको भनाइ छ ।