सहकारी लेखा व्यबस्थापन तालिम शुरु, व्यवस्थित हिसाब राख्न सहयोग पुग्ने अपेक्षा

मकवानपुर, २७ चैत । जिल्ला विकास समितिको आर्थिक सहयोग, डिभिजन सहकारी कार्यालयको आयोजना तथा जिल्ला सहकारी संघ मकवानपुरको समन्वयमा ६ दिवसीय सहकारी लेखा व्यबस्थापन तालिम बुधबारबाट शुरु भएको छ ।

तालिमको बारेमा जानकारी दिदैं डिभिजन सहकारी कार्यालयका प्रमुख भीम परियारले यस तालीममा सहकारी लेखा संग सम्वन्धित २४ वटा विबिध विषयमा प्रशिक्षण हुने बताए । तालिमको सहजीकरण जिल्ला सहकारी संघ मकवानपुर, डिभिजन सहकारी कार्यालय, जिल्ला विकास समितिका पदाधिकारीहरुले गर्ने छन् ।

यस अघि हेटौडा नगर र नगर आसपासका गाविसका २५ वटा सहकारी संस्थाका पदाधिकारीलाई लक्षित गरि तालिम संचालन गरिएकोमा यो दोस्रो तालिम हो । यसै गरी आगामी दिनमा जिल्लाको पूर्वी क्षेत्रमा पनि संचालन गरिने लक्ष्य रहेको कुरा परियारले बताए । जिल्लामा संचालनमा रहेका सहकारी संस्थाहरुले व्यवस्थित हिसाव नराखेकै कारण अपारदर्शी भएको उजुरी आउने क्रम यस तालिम पश्चात नियन्त्रण हुने विश्वास लिएको उनको भनाइ थियो ।

जिल्लाको पश्चिमी क्षेत्रमा संचालनमा रहेका मनहरी, राक्सिरांङ, सरिखेत, काँकडा, खैंराङ, वसामाडी, हाँडीखोला लगायत २५ वटा विभिन्न विषयगत प्रारम्भिक सहकारी संस्थाका व्यवस्थापक तथा संचालक समितिका पदाधिकारीहरुको सहभागीता रहेको छ ।