सहकारी दिवसको अवसरमा बिरामीहरुलाई फलफुल वितरण

सिमरा, १९ चैत्र । ५७ औं राष्ट्रिय सहकारी दिवसको अवसरमा बारा जिल्ला बचत तथा ऋण सहकारी संघ र जीवन सहारा सहकारी कलैयाले जिल्ला अस्पताल कलैयाका बिरामीहरुलाई फलफुल वितरण गरेका छन् ।

नेपाल बचत तथा ऋण केन्द्रीय सहकारी संघ नेफ्स्कूनका सञ्चालक कृष्ण पौडेल, जिल्ला अस्पतालका प्रमुख डा. सुन्दरश्याम झा, डिभिजन सहकारी कार्यालयका प्रमुख महेन्द्र राउत, बारा जिल्ला बचत तथा ऋण सहकारी संघका अध्यक्ष भोला गौतम, सचिव सत्तेन्द्र ठाकुर, जीवन सहारा सहकारीका लेखा संयोजक सुरेश मोदकलगायतले ४० जना बिरामीहरुलाई फलफुल वितरण गरेका हुन ।

कार्यक्रममा बोल्दै नेफ्स्कूनका सञ्चालक कृष्ण पौडेलले सहकारी अभियान आम नागरिकको आर्थिक सामाजिक रुपान्तरण र सामाजिक न्यायको लागि अपरिहार्य पद्धतिको रुपमा विकास भएको बताए ।

२०१३ चैत्र २० गतेबाट शुरु भएको सहकारी अभियान यस वर्ष ‘सहकारीमार्फत दिगो आर्थिक विकास तथा सामाजिक न्याय’ मूलनाराका साथ देशव्यापी रुपमा विभिन्न रचनात्मक क्रियाकलापसहित आज ५७ औं राष्ट्रिय सहकारी दिवस मनाइदैछ । चैत्र २० गते हजारौं सहकारीकर्मीहरुले कलैयामा सहकारी र्याली तथा सभा आयोजना भई रहेको जिल्ला बचत तथा ऋण सहकारी संघका अध्यक्ष भोला गौतमले बताए ।