भरतपुर साकोसको १७ औं स्थापना दिवस मनाइयो

चितवन, १८ चैत । भरतपुर नगरपालिका वडा नं. १२ मा अवस्थित भरतपुर वचत तथा ऋण सहकारी संस्था (साकोस)को १७ औं स्थापना दिवस सोमबार रुक्तदान कार्यक्रम गरी मनाएको छ ।

संस्थाका अध्यक्ष मिन प्रसाद सुबेदीको अध्यक्षतामा भएको कार्यक्रममा प्रमुख अतिथि नेपाल बचत तथा ऋण केन्द्रिय सहकारी संघ लि.का सञ्चालक सदस्य एवं चितवन जिल्ला बचत तथा ऋण सहकारी संघका अध्यक्ष नवराज सापकोटा रहेका थिए ।

कार्यक्रममा संस्थामा ३ पटक भन्दा बढी रक्तदान गर्ने सदस्यहरु ज्ञानीराजा बज्राचार्य, प्रदिप पोखेरल, दिपक पोखेरल, दिपक सुबेदी र नरबहादुर मगरलाई सम्मान प्रदान गरिएको थियो । अधिकतम बाल बचत तर्फ बिशेष थापामगर लै पुरस्कार प्रदान गरिएको छ । संस्थाले आगामी वर्ष देखि पेन्सन योजना, जेष्ठ नागरिक बचत योजना, पर्व बचत योजना संचालन गरिने जनाएको छ ।

२०५४ सालमा ४५ जना संस्थापक सदस्यहरुबाट स्थापना भई शुरु भएको यस संस्थामा हाल ८ सय ६५ जना शेयर सदस्य रहेका छन् । संस्थाको कुल पुँजी ७ करोड १५ लाख ४५ हजार र शेयर पुँजी १ करोड २७ लाख ७६ हजार रहेको संस्थाले जनाएको छ ।